ਸੀਯੂ ਨੇ ‘ਇੰਡੀਆ ਏਆਈ ਮਿਸ਼ਨ’ ਦੀ ਤਰਜ਼ ‘ਤੇ ਲੌਂਚ ਕੀਤਾ ਆਪਣਾ ‘ਏਆਈ ਮਿਸ਼ਨ’; 1.5 ਲੱਖ ਨੌਜਵਾਨਾਂ ਨੂੰ ਦਿੱਤੀ ਜਾਵੇਗੀ ਟ੍ਰੇਨਿੰਗ
ਚੰਡੀਗੜ੍ਹ, 20 ਫਰਵਰੀ : ਚੰਡੀਗੜ੍ਹ ਯੂਨੀਵਰਸਿਟੀ ਵਿਖੇ ਤਿੰਨ ਰੋਜ਼ਾ ‘ਏਆਈ ਫ਼ੈਸਟ 2026′ ਦਾ ਬੀਤੇ ਦਿਨੀਂ ਪ੍ਰਭਾਵਸ਼ਾਲੀ ਆਗ਼ਾਜ਼ ਹੋਇਆ, ਜੋ 21 ਫਰਵਰੀ ਤੱਕ ਜਾਰੀ ਰਹੇਗਾ। ‘ਇੰਡੀਆ ਏਆਈ ਇੰਪੈਕਟ ਸਮਿਟ’ ਦੀ ਤਰਜ਼ ‘ਤੇ ਕਰਵਾਏ ਜਾ ਰਹੇ ਇਸ ਫ਼ੈਸਟ ਦਾ ਮੁੱਖ ਮਕਸਦ ਨੌਜਵਾਨਾਂ ਨੂੰ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੀ ਮਹੱਤਤਾ ਸਮਝਾ ਕੇ ਉਨ੍ਹਾਂ ਨੂੰ ‘ਵਿਕਸਿਤ ਭਾਰਤ’ ਦੇ ਸੁਪਨੇ ਲਈ ਤਿਆਰ ਕਰਨਾ ਹੈ।
ਉਦਘਾਟਨੀ ਸਮਾਰੋਹ ਵਿੱਚ ਰਾਜ ਸਭਾ ਮੈਂਬਰ ਅਤੇ ਯੂਨੀਵਰਸਿਟੀ ਦੇ ਚਾਂਸਲਰ ਸਤਨਾਮ ਸਿੰਘ ਸੰਧੂ ਸਮੇਤ ਪ੍ਰਸਿੱਧ ਉਦਮੀ ਅੰਕੁਰ ਵਾਰਿਕੂ, ਰੌਨੀ ਸਕਰੂਵਾਲਾ ਅਤੇ ਹੋਰ ਗਲੋਬਲ ਮਾਹਰ ਸ਼ਾਮਲ ਹੋਏ। ਇਸ ਦੌਰਾਨ ਮਾਹਰਾਂ ਨੇ ‘ਬਦਲਦੀ ਮਨੁੱਖਤਾ ਦੇ ਨਾਲ ਬਦਲਦਾ ਏਆਈ’ ਅਤੇ ‘ਤਕਨੀਕੀ ਫ਼ਰੰਟੀਅਰਜ਼’ ਵਰਗੇ ਅਹਿਮ ਵਿਸ਼ਿਆਂ ‘ਤੇ ਵਿਚਾਰ-ਚਰਚਾ ਕੀਤੀ।
ਯੂਨੀਵਰਸਿਟੀ ਨੇ ਇਸ ਮੌਕੇ ‘ਸੀਯੂ ਏਆਈ ਮਿਸ਼ਨ’ ਲੌਂਚ ਕਰਕੇ ਇੱਕ ਨਵਾਂ ਇਤਿਹਾਸ ਰਚਿਆ ਹੈ, ਜਿਸ ਤਹਿਤ 1.5 ਲੱਖ ਨੌਜਵਾਨਾਂ ਨੂੰ ਏਆਈ ਸਾਖਰਤਾ ਪ੍ਰਦਾਨ ਕਰਨ ਦਾ ਟੀਚਾ ਮਿੱਥਿਆ ਗਿਆ ਹੈ। ਇਸ ਦੇ ਨਾਲ ਹੀ ਰਾਸ਼ਟਰੀ ਕੁਆਂਟਮ ਮਿਸ਼ਨ ਦੇ ਤਹਿਤ ‘ਬੋਸ-ਆਈਨਸਟਾਈਨ ਕੁਆਂਟਮ ਸੈਂਟਰ ਆਫ਼ ਐਕਸੀਲੈਂਸ’ ਦੀ ਵੀ ਸ਼ੁਰੂਆਤ ਕੀਤੀ ਗਈ।
ਚਾਂਸਲਰ ਸਤਨਾਮ ਸਿੰਘ ਸੰਧੂ ਨੇ ਕਿਹਾ ਕਿ ਏਆਈ ਭਾਰਤ ਦੇ ਅਗਲੇ ਟ੍ਰਿਲੀਅਨ-ਡਾਲਰ ਵਿਕਾਸ ਦਾ ਇੰਜਣ ਬਣੇਗਾ। ਉਨ੍ਹਾਂ ਦੱਸਿਆ ਕਿ ਚੰਡੀਗੜ੍ਹ ਯੂਨੀਵਰਸਿਟੀ ਦੇਸ਼ ਦੀ ਪਹਿਲੀ ਨਿੱਜੀ ਯੂਨੀਵਰਸਿਟੀ ਬਣ ਗਈ ਹੈ, ਜਿਸ ਨੇ ਇੰਡੀਆ ਏਆਈ ਮਿਸ਼ਨ ਦੇ ਅਨੁਸਾਰ ਆਪਣਾ ਸੰਸਥਾਗਤ ਰੋਡਮੈਪ ਤਿਆਰ ਕੀਤਾ ਹੈ।
ਫ਼ੈਸਟ ਵਿੱਚ 174 ਤੋਂ ਵੱਧ ਵਿਦਿਅਕ ਸੰਸਥਾਵਾਂ ਦੇ 10,000 ਤੋਂ ਜ਼ਿਆਦਾ ਵਿਦਿਆਰਥੀ ਹਿੱਸਾ ਲੈ ਰਹੇ ਹਨ। ਜੇਤੂ ਟੀਮਾਂ ਲਈ 1 ਕਰੋੜ ਰੁਪਏ ਤੋਂ ਵੱਧ ਦੇ ਨਕਦ ਇਨਾਮ ਰੱਖੇ ਗਏ ਹਨ। ਪ੍ਰਸਿੱਧ ਕਾਰੋਬਾਰੀ ਅੰਕੁਰ ਵਾਰਿਕੂ ਨੇ ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਏਆਈ ਤੋਂ ਡਰਨ ਦੀ ਬਜਾਏ ਇਸ ਨੂੰ ਅਪਣਾਉਣਾ ਚਾਹੀਦਾ ਹੈ, ਕਿਉਂਕਿ ਭਵਿੱਖ ਵਿੱਚ ਉਹੀ ਇਨਸਾਨ ਸਫ਼ਲ ਹੋਵੇਗਾ ਜੋ ਤਕਨਾਲੋਜੀ ਦੇ ਨਾਲ ਚੱਲਣਾ ਜਾਣਦਾ ਹੋਵੇਗਾ। ਇਸੇ ਤਰ੍ਹਾਂ ਰੌਨੀ ਸਕਰੂਵਾਲਾ ਨੇ ਜ਼ੋਰ ਦਿੱਤਾ ਕਿ ਏਆਈ ਮਨੁੱਖੀ ਭਾਵਨਾਵਾਂ ਦੀ ਥਾਂ ਨਹੀਂ ਲੈ ਸਕਦਾ, ਪਰ ਇਹ ਕੰਮ ਕਰਨ ਦੇ ਤਰੀਕੇ ਨੂੰ ਬਿਹਤਰ ਜ਼ਰੂਰ ਬਣਾ ਸਕਦਾ ਹੈ।
ਸਮਾਗਮ ਦੌਰਾਨ ‘ਨਾਰੀ’ ਸਕੀਮ ਵੀ ਲੌਂਚ ਕੀਤੀ ਗਈ, ਜਿਸ ਦਾ ਮਕਸਦ ਸਟਾਰਟਅੱਪ, ਸਿਹਤ ਅਤੇ ਅਕਾਦਮਿਕ ਖੇਤਰਾਂ ਵਿੱਚ ਔਰਤਾਂ ਦੀ ਭੂਮਿਕਾ ਨੂੰ ਮਜ਼ਬੂਤ ਕਰਨਾ ਹੈ। ਪੈਨਲ ਚਰਚਾ ਦੌਰਾਨ ਹਾਰਵਰਡ ਅਤੇ ਗੂਗਲ ਵਰਗੀਆਂ ਸੰਸਥਾਵਾਂ ਦੀਆਂ ਪ੍ਰਤੀਨਿਧ ਔਰਤਾਂ ਨੇ ਨੈਤਿਕ ਏਆਈ ਢਾਂਚੇ ਅਤੇ ਜ਼ਿੰਮੇਵਾਰ ਸ਼ਾਸਨ ਪ੍ਰਣਾਲੀ ‘ਤੇ ਚਰਚਾ ਕੀਤੀ।
ਫ਼ੈਸਟ ਦੇ ਮੁੱਖ ਪੜਾਅ ‘ਕੈਂਪਸ ਟੈਂਕ’ ਅਤੇ ‘ਸੈਂਡਬਾਕਸ’ ਦੇ ਫਾਈਨਲ ਮੁਕਾਬਲੇ 20 ਅਤੇ 21 ਫਰਵਰੀ ਨੂੰ ਹੋਣਗੇ, ਜਿੱਥੇ ਵਿਦਿਆਰਥੀ ਆਪਣੇ ਨਵੇਂ ਉਤਪਾਦਾਂ ਅਤੇ ਆਈਡੀਆਜ਼ ਦਾ ਪ੍ਰਦਰਸ਼ਨ ਕਰਨਗੇ।
Read More : ਵਪਾਰੀਆਂ ਦੀ ਸੁਰੱਖਿਆ ਨਾਲ ਕੋਈ ਸਮਝੌਤਾ ਨਹੀਂ, ਸ਼ਿਕਾਇਤਾਂ ਦਾ ਪਹਿਲ ਦੇ ਆਧਾਰ ‘ਤੇ ਹੋਵੇਗਾ ਨਿਪਟਾਰਾ : ਹਰਪਾਲ ਚੀਮਾ