ਅਦਾਲਤ ਨੇ ਕਿਹਾ- ਹੁਣ ਮਰੀਜ਼ ਨੂੰ ਮਸ਼ੀਨਾਂ ਦੇ ਸਹਾਰੇ ਜ਼ਿੰਦਾ ਰੱਖਣ ਦੀ ਲੋੜ ਨਹੀਂ, ਸਨਮਾਨ ਨਾਲ ਵਿਦਾਈ ਦਿੱਤੀ ਜਾਵੇ
ਨਵੀਂ ਦਿੱਲੀ, 11 ਮਾਰਚ : ਸੁਪਰੀਮ ਕੋਰਟ ਨੇ ਇਕ ਬਹੁਤ ਹੀ ਭਾਵੁਕ ਫੈਸਲਾ ਸੁਣਾਉਂਦੇ ਹੋਏ 31 ਸਾਲਾ ਹਰੀਸ਼ ਰਾਣਾ ਨੂੰ ਇੱਛਾ ਮੌਤ ਦੀ ਇਜਾਜ਼ਤ ਦੇ ਦਿੱਤੀ ਹੈ। ਹਰੀਸ਼ ਪਿਛਲੇ 12 ਸਾਲਾਂ ਤੋਂ ਕੋਮਾ ਵਿੱਚ ਹਨ ਅਤੇ ਸਿਰਫ ਮਸ਼ੀਨਾਂ (ਲਾਈਫ ਸਪੋਰਟ) ਦੇ ਸਹਾਰੇ ਸਾਹ ਲੈ ਰਹੇ ਹਨ। ਅਦਾਲਤ ਦੇ ਹੁਕਮਾਂ ਤੋਂ ਬਾਅਦ ਹੁਣ ਉਨ੍ਹਾਂ ਨੂੰ ਲੱਗੀਆਂ ਇਹ ਮਸ਼ੀਨਾਂ ਹਟਾ ਦਿੱਤੀਆਂ ਜਾਣਗੀਆਂ ਤਾਂ ਜੋ ਉਹ ਕੁਦਰਤੀ ਮੌਤ ਮਰ ਸਕਣ।
ਕੀ ਸੀ ਪੂਰਾ ਮਾਮਲਾ
ਸਾਲ 2013 ਵਿਚ ਹਰੀਸ਼ ਰਾਣਾ ਇਕ ਇਮਾਰਤ ਦੀ ਚੌਥੀ ਮੰਜ਼ਿਲ ਤੋਂ ਡਿੱਗ ਗਏ ਸਨ। ਇਸ ਹਾਦਸੇ ਵਿਚ ਉਨ੍ਹਾਂ ਦੇ ਸਿਰ ‘ਤੇ ਗੰਭੀਰ ਸੱਟ ਲੱਗੀ ਸੀ, ਜਿਸ ਤੋਂ ਬਾਅਦ ਉਹ ਕਦੇ ਹੋਸ਼ ਵਿਚ ਨਹੀਂ ਆਏ। ਹਰੀਸ਼ ਦੇ ਮਾਪਿਆਂ ਨੇ ਅਦਾਲਤ ਨੂੰ ਗੁਹਾਰ ਲਾਈ ਸੀ ਕਿ ਉਨ੍ਹਾਂ ਦੇ ਪੁੱਤਰ ਦੀ ਹਾਲਤ ਬਹੁਤ ਤਰਸਯੋਗ ਹੈ ਅਤੇ ਉਸ ਨੂੰ ਇਸ ਦੁੱਖ ਤੋਂ ਮੁਕਤੀ ਦਿੱਤੀ ਜਾਵੇ।
ਅਦਾਲਤ ਨੇ ਕੀ ਕਿਹਾ
ਜਸਟਿਸ ਜੇ. ਬੀ. ਪਾਰਦੀਵਾਲਾ ਅਤੇ ਜਸਟਿਸ ਕੇ.ਵੀ. ਵਿਸ਼ਵਨਾਥਨ ਦੀ ਅਦਾਲਤ ਨੇ ਏਮਜ਼ (AIIMS) ਦੇ ਡਾਕਟਰਾਂ ਦੀ ਰਿਪੋਰਟ ਦੇਖੀ। ਡਾਕਟਰਾਂ ਨੇ ਦੱਸਿਆ ਕਿ ਹਰੀਸ਼ ਦੇ ਠੀਕ ਹੋਣ ਦੀ ਹੁਣ ਕੋਈ ਉਮੀਦ ਨਹੀਂ ਹੈ। ਇਸ ‘ਤੇ ਅਦਾਲਤ ਨੇ ਕਿਹਾ ਕਿ ਹਰੀਸ਼ ਨੂੰ ਹੁਣ ਹਸਪਤਾਲ ਦੇ ਖਾਸ ਵਾਰਡ (ਪੈਲੀਏਟਿਵ ਕੇਅਰ) ਵਿਚ ਰੱਖਿਆ ਜਾਵੇ ਅਤੇ ਹੌਲੀ-ਹੌਲੀ ਇਲਾਜ ਬੰਦ ਕਰ ਦਿੱਤਾ ਜਾਵੇ। ਅਦਾਲਤ ਨੇ ਖਾਸ ਤੌਰ ‘ਤੇ ਕਿਹਾ ਕਿ ਇਸ ਦੌਰਾਨ ਹਰੀਸ਼ ਦੇ ਮਾਨ-ਸਨਮਾਨ ਦਾ ਪੂਰਾ ਖਿਆਲ ਰੱਖਿਆ ਜਾਵੇ।
ਕਾਨੂੰਨ ਕੀ ਕਹਿੰਦਾ ਹੈ?
ਸੁਪਰੀਮ ਕੋਰਟ ਦੇ ਨਿਯਮਾਂ ਮੁਤਾਬਕ ਜੇਕਰ ਕੋਈ ਮਰੀਜ਼ ਅਜਿਹੀ ਹਾਲਤ ਵਿਚ ਹੋਵੇ ਜਿੱਥੋਂ ਉਸ ਦਾ ਵਾਪਸ ਆਉਣਾ ਅਸੰਭਵ ਹੋਵੇ, ਤਾਂ ਮੈਡੀਕਲ ਬੋਰਡ ਦੀ ਸਲਾਹ ‘ਤੇ ਉਸ ਦੀਆਂ ਜੀਵਨ-ਰੱਖਿਅਕ ਮਸ਼ੀਨਾਂ ਹਟਾਈਆਂ ਜਾ ਸਕਦੀਆਂ ਹਨ। ਹਰੀਸ਼ ਰਾਣਾ ਦਾ ਮਾਮਲਾ ਵੀ ਇਸੇ ਸ਼੍ਰੇਣੀ ਵਿੱਚ ਰੱਖਿਆ ਗਿਆ ਹੈ।
Read More : ਇਟਲੀ ’ਚ 6 ਮਿਲੀਅਨ ਲੋਕ ਮੋਟਾਪੇ ਤੋਂ ਪ੍ਰਭਾਵਿਤ, ਹਰ ਤੀਜਾ ਬੱਚਾ ਬਿਮਾਰੀ ਦੀ ਲਪੇਟ ’ਚ