ਤੁਰੰਤ ਡਿਪੋਰਟ ਕਰਨ ਲਈ ਅਰਜ਼ੀ ਦਾਇਰ
ਲਾਹੌਰ , 26 ਨਵੰਬਰ : ਭਾਰਤ ਤੋਂ ਵੀਜ਼ਾ ’ਤੇ ਪਾਕਿਸਤਾਨ ਆਈ ਇਕ ਸਿੱਖ ਔਰਤ ਦੇ ਧਰਮ ਬਦਲ ਕੇ ਨਿਕਾਹ ਕਰਨ ਦੇ ਮਾਮਲੇ ਨੇ ਨਵਾਂ ਵਿਵਾਦ ਖੜ੍ਹਾ ਕਰ ਦਿਤਾ ਹੈ। ਇਸ ਘਟਨਾ ਖ਼ਿਲਾਫ਼ ਸ੍ਰੀ ਨਨਕਾਣਾ ਸਾਹਿਬ ਦੇ ਸਿੱਖ ਆਗੂ ਮਹਿੰਦਰ ਪਾਲ ਸਿੰਘ ਨੇ ਲਾਹੌਰ ਹਾਈਕੋਰਟ ’ਚ ਜਨਹਿਤ ਪਟੀਸ਼ਨ ਦਾਇਰ ਕੀਤੀ ਹੈ। ਪਟੀਸ਼ਨ ਐਡਵੋਕੇਟ ਅਲੀ ਚੰਗੇਜ਼ੀ ਸੰਧੂ ਰਾਹੀਂ ਦਾਇਰ ਹੋਈ ਹੈ, ਜਿਸ ’ਚ ਭਾਰਤੀ ਸਿੱਖ ਯਾਤਰੀ ਵੱਲੋਂ ਵੀਜ਼ਾ ਨਿਯਮ ਤੋੜੇ ਜਾਣ ਅਤੇ ਗੈਰ-ਕਾਨੂੰਨੀ ਤੌਰ ’ਤੇ ਪਾਕਿਸਤਾਨ ’ਚ ਰਹਿ ਰਹੀ ਹੋਣ ਦੇ ਦੋਸ਼ ਲਾਏ ਗਏ ਹਨ।
ਇਹ ਅਰਜ਼ੀ ਮਹਿੰਦਰ ਪਾਲ ਸਿੰਘ ਸਾਬਕਾ ਮੈਂਬਰ ਪੰਜਾਬ ਅਸੈਂਬਲੀ ਅਤੇ ਸਾਬਕਾ ਪਾਰਲੀਮੈਂਟਰੀ ਸਕੱਤਰ ਤੇ ਹਿਊਮਨ ਰਾਈਟਸ ਐਂਡ ਮਾਇਨਾਰਿਟੀ ਅਫੇਅਰਜ਼ ਨੇ ਦਾਇਰ ਕੀਤੀ ਹੈ। ਇਸ ਵਿਚ ਫੈਡਰਲ ਹਕੂਮਤ, ਵਜ਼ਾਰਤ-ਏ-ਦਾਖ਼ਲਾ, ਐੱਫ਼. ਆਈ. ਏ. ਅਤੇ ਹਕੂਮਤ-ਏ-ਪੰਜਾਬ ਨੂੰ ਜਵਾਬਦੇਹੀ ਲਈ ਨਾਮਜ਼ਦ ਕੀਤਾ ਗਿਆ ਹੈ।
ਅਰਜ਼ੀ ਮੁਤਾਬਕ ਮੁਕਤਸਰ ਜ਼ਿਲੇ (ਭਾਰਤ, ਪੰਜਾਬ) ਦੀ ਰਹਿਣ ਵਾਲੀ ਸਰਬਜੀਤ ਕੌਰ 4 ਨਵੰਬਰ 2025 ਨੂੰ 10 ਦਿਨਾਂ ਦੇ ਸਿੰਗਲ-ਐਂਟਰੀ ਧਾਰਮਿਕ ਵੀਜ਼ੇ ’ਤੇ ਪਾਕਿਸਤਾਨ ਦਾਖ਼ਲ ਹੋਈ ਸੀ, ਜਿਸ ਦੀ ਮਿਆਦ 13 ਨਵੰਬਰ ਤੱਕ ਸੀ ਅਤੇ ਉਸ ਦੀ ਆਵਾਜਾਈ ਸਿਰਫ਼ ਨਨਕਾਣਾ ਸਾਹਿਬ, ਕਰਤਾਰਪੁਰ ਆਦਿ ਨਿਰਧਾਰਿਤ ਧਾਰਮਿਕ ਅਸਥਾਨਾਂ ਤੱਕ ਸੀਮਿਤ ਸੀ।
ਪਟੀਸ਼ਨਰ ਦੇ ਮੁਤਾਬਕ ਸਰਬਜੀਤ ਕੌਰ ਨੇ ਪਾਕਿਸਤਾਨ ਪਹੁੰਚਣ ਤੋਂ ਬਾਅਦ ਆਪਣੇ ਨਿਰਧਾਰਿਤ ਯਾਤਰਾ-ਰੂਟ ਅਤੇ ਵੀਜ਼ਾ ਸ਼ਰਤਾਂ ਦੀ ਪਾਲਣਾ ਨਹੀਂ ਕੀਤੀ ਅਤੇ ਵੀਜ਼ਾ ਮਿਆਦ ਖ਼ਤਮ ਹੋਣ ਤੋਂ ਬਾਅਦ ਵੀ ਦੇਸ਼ ਵਿਚ ਗੈਰ-ਕਾਨੂੰਨੀ ਤੌਰ ’ਤੇ ਰਹਿ ਰਹੀ ਹੈ, ਜੋ ਸਪੱਸ਼ਟ ਤੌਰ ’ਤੇ ਕਾਨੂੰਨ ਦੀ ਉਲੰਘਣਾ ਹੈ।
ਅਰਜ਼ੀ ਵਿਚ ਇਹ ਵੀ ਦਾਅਵਾ ਕੀਤਾ ਗਿਆ ਹੈ ਕਿ ਸਰਬਜੀਤ ਕੌਰ ’ਤੇ ਭਾਰਤ ਦੇ ਬਠਿੰਡਾ ਅਤੇ ਕਪੂਰਥਲਾ ਸ਼ਹਿਰਾਂ ’ਚ ਧੋਖਾਦੇਹੀ ਦੇ ਮਾਮਲੇ ਦਰਜ ਹਨ।
ਮਹਿੰਦਰ ਪਾਲ ਸਿੰਘ ਨੇ ਕਿਹਾ ਕਿ ਸਰਬਜੀਤ ਕੌਰ ਨੂੰ ਗੈਰ-ਕਾਨੂੰਨੀ ਵਿਦੇਸ਼ੀ ਐਲਾਨ ਕੀਤਾ ਜਾਵੇ। ਉਸ ਦੀ ਤੁਰੰਤ ਡਿਪੋਰਟੇਸ਼ਨ ਦਾ ਹੁਕਮ ਦਿੱਤਾ ਜਾਵੇ ਤੇ ਐੱਫ਼. ਆਈ. ਏ. ਨੂੰ ਇਹ ਜਾਂਚ ਦਾ ਹੁਕਮ ਦਿੱਤਾ ਜਾਵੇ ਕਿ ਬਿਨਾਂ ਢੰਗ ਨਾਲ ਬੈਕਗ੍ਰਾਊਂਡ ਚੈੱਕ ਕੀਤੇ ਵੀਜ਼ਾ ਕਿਵੇਂ ਜਾਰੀ ਕੀਤਾ ਗਿਆ। ਧਾਰਮਿਕ ਵੀਜ਼ਿਆਂ ਲਈ ਸਖ਼ਤ ਨਿਯਮ ਬਣਾਏ ਜਾਣ ਅਤੇ ਯਾਤਰੀਆਂ ਦੀ ਵਾਪਸੀ ਯਕੀਨੀ ਬਣਾਉਣ ਲਈ ਨਿਗਰਾਨੀ ਮਕੈਨਿਜ਼ਮ ਤਿਆਰ ਕੀਤਾ ਜਾਵੇ।
Read More : ਸੈਨੇਟ ਚੋਣਾਂ ਦੀ ਮੰਗ ਨੂੰ ਲੈ ਕੇ ਪੰਜਾਬ ਯੂਨੀਵਰਸਿਟੀ ਬੰਦ