ਲੁਧਿਆਣਾ ਦੇ ਸਾਰੇ 5 ਬਦਮਾਸ਼ ਜ਼ੀਰਕਪੁਰ ’ਚ ਗ੍ਰਿਫ਼ਤਾਰ
ਕਰਨਾਲ, 24 ਨਵੰਬਰ : ਹਰਿਆਣਾ ਦੇ ਕਰਨਾਲ ਸੁਭਾਸ਼ ਕਾਲੋਨੀ ’ਚ ਵਿਆਹ ਵਾਲੇ ਇਕ ਘਰ ’ਚ ਬਦਮਾਸ਼ਾਂ ਨੇ ਸੋਮਵਾਰ ਸਵੇਰੇ ਲੁੱਟਮਾਰ ਕੀਤੀ। 5 ਬਦਮਾਸ਼ ਮੋਟਰਸਾਈਕਲਾਂ ’ਤੇ ਆਏ। ਉਨ੍ਹਾਂ ਲਾੜੇ ਦੀ ਭੂਆ ਤੋਂ ਕੋਈ ਐਡਰੈੱਸ ਪੁੱਛਿਆ। ਫਿਰ ਪਿਸਤੌਲ ਦੇ ਬੱਟ ਨਾਲ ਉਸ ਦੇ ਸਿਰ ’ਤੇ’ ਵਾਰ ਕੀਤਾ। ਇਸ ਤੋਂ ਪਹਿਲਾਂ ਕਿ ਪਰਿਵਾਰ ਦੇ ਮੈਂਬਰ ਕੁਝ ਸਮਝਦੇ, ਬਦਮਾਸ਼ ਘਰ ’ਚ ਦਾਖਲ ਹੋ ਗਏ ਤੇ ਬੰਦੂਕ ਦੀ ਨੋਕ ’ਤੇ ਸਾਰਿਆਂ ਨੂੰ ਬੰਧਕ ਬਣਾ ਲਿਆ। ਸਾਰਿਆਂ ਦੇ ਮੋਬਾਈਲ ਫੋਨ ਖੋਹ ਲਏ।
ਪਰਿਵਾਰ ਦੇ ਮੈਂਬਰਾਂ ਅਨੁਸਾਰ ਬਦਮਾਸ਼ਾਂ ਨੇ ਔਰਤਾਂ ਦੇ ਗਹਿਣੇ, ਅਲਮਾਰੀਆਂ ’ਚ ਰੱਖੀ ਨਕਦੀ ਤੇ ਹੋਰ ਕੀਮਤੀ ਸਾਮਾਨ ਲੁੱਟ ਲਿਅਾ। ਪਰਿਵਾਰ ਅਨੁਸਾਰ ਘਟਨਾ ’ਚ 50 ਤੋਂ 80 ਲੱਖ ਰੁਪਏ ਦਾ ਨੁਕਸਾਨ ਹੋਇਆ ਹੈ। ਜਦੋਂ ਆਸਟ੍ਰੇਲੀਆ ਵਾਸੀ ਲਾੜੇ ਨੇ ਵਿਰੋਧ ਕੀਤਾ ਤਾਂ ਬਦਮਾਸ਼ਾਂ ਨੇ ਗੋਲੀ ਚਲਾ ਦਿੱਤੀ ਜਿਸ ਨਾਲ ਉਹ ਜ਼ਖਮੀ ਹੋ ਗਿਆ।
ਬਦਮਾਸ਼ਾਂ ਨੇ ਲਗਭਗ 45 ਮਿੰਟ ਤੱਕ ਘਰ ਦੇ ਹਰ ਕੋਨੇ ਦੀ ਤਲਾਸ਼ੀ ਲਈ। ਅਪਰਾਧ ਕਰਨ ਤੋਂ ਬਾਅਦ ਉਨ੍ਹਾਂ ਆਪਣੀ ਵਰਨਾ ਕਾਰ ’ਚ ਭੱਜਦੇ ਹੋਏ 5 ਗੋਲੀਆਂ ਚਲਾਈਆਂ। ਲਾੜੇ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ ਜਿੱਥੇ ਉਸ ਦੀ ਹਾਲਤ ਸਥਿਰ ਹੈ।
ਐੱਸ. ਪੀ. ਗੰਗਾ ਰਾਮ ਪੂਨੀਆ ਨੇ ਸੀਨੀਅਰ ਅਧਿਕਾਰੀਆਂ ਨਾਲ ਘਟਨਾ ਵਾਲੀ ਥਾਂ ਦਾ ਦੌਰਾ ਕੀਤਾ। ਪੁਲਸ ਨੇ ਅਪਰਾਧੀਆਂ ਨੂੰ ਫੜਨ ਲਈ ਟੀਮਾਂ ਬਣਾਈਆਂ ਤੇ ਗੁਆਂਢੀ ਸੂਬਿਆਂ ਨਾਲ ਲੱਗਦੀਆਂ ਹੱਦਾਂ ‘ਤੇ ਚੌਕਸੀ ਵਧਾ ਦਿੱਤੀ।
ਸਾਈਬਰ ਸੈੱਲ ਦੀ ਮਦਦ ਨਾਲ ਪੁਲਸ ਦੀਆਂ 6 ਟੀਮਾਂ ਨੇ ਅਪਰਾਧੀਆਂ ਬਾਰੇ ਜਲਦੀ ਜਾਣਕਾਰੀ ਹਾਸਲ ਕੀਤੀ, ਜਿਸ ਕਾਰ ’ਚ ਬਦਮਾਸ਼ ਭੱਜੇ ਸਨ, ਉਹ ਆਈ. ਟੀ. ਆਈ. ਚੌਕ ਨੇੜੇ ਮਿਲ ਗਈ। ਐੱਫ. ਐੱਸ. ਐੱਲ. ਦੀਆਂ ਟੀਮਾਂ ਨੇ ਅਪਰਾਧ ਵਾਲੀ ਥਾਂ ਤੋਂ ਸਬੂਤ ਇਕੱਠੇ ਕੀਤੇ।
ਪੂਨੀਆ ਨੇ ਦੱਸਿਆ ਕਿ ਬਦਮਾਸ਼ਾਂ ਨੂੰ ਦੁਪਹਿਰ ਵੇਲੇ ਜ਼ੀਰਕਪੁਰ ’ਚ ਫੜ ਲਿਆ ਗਿਆ। ਉਨ੍ਹਾਂ ਦੀ ਪਛਾਣ ਰਾਜੀਵ ਉਰਫ ਰਾਜਾ, ਦੀਪਕ ਉਰਫ ਹੈਰੀ, ਪ੍ਰਿੰਸ ਕੁਮਾਰ, ਅੰਮ੍ਰਿਤ ਪਾਲ ਤੇ ਅਭਿਸ਼ੇਕ ਵਜੋਂ ਹੋਈ ਹੈ। ਸਾਰੇ ਲੁਧਿਆਣਾ ਦੇ ਰਹਿਣ ਵਾਲੇ ਹਨ।
Read More : ਭਾਈਚਾਰਕ ਸਾਂਝ ਅਤੇ ਏਕਤਾ ਦਾ ਚਾਨਣ ਮੁਨਾਰਾ ਹੋ ਨਿੱਬੜਿਆ ਸਰਬ-ਧਰਮ ਸੰਮੇਲਨ