5 ਗੈਂਗਸਟਰਾਂ ਖਿਲਾਫ ਰੈੱਡ ਕਾਰਨਰ ਨੋਟਿਸ ਜਾਰੀ
ਬਟਾਲਾ, 31 ਮਈ :- ਪੰਜਾਬ ਪੁਲਸ ਨੇ ਗੈਂਗਸਟਰਾਂ ਦੀਆਂ ਅਪਰਾਧਿਕ ਅਤੇ ਸਮਾਜ ਵਿਰੋਧੀ ਗਤੀਵਿਧੀਆਂ ’ਤੇ ਰੋਕ ਲਗਾਉਣ ਲਈ ਅੰਤਰਰਾਸ਼ਟਰੀ ਪੱਧਰ ’ਤੇ ਕਾਰਵਾਈ ਕਰਨ ਵਿਚ ਸਫਲਤਾ ਹਾਸਲ ਕੀਤੀ ਗਈ ਹੈ।
ਇਸ ਸਬੰਧੀ ਐੱਸ. ਪੀ. ਡੀ. ਗੁਰਪ੍ਰਤਾਪ ਸਿੰਘ ਸਹੋਤਾ ਨੇ ਕਿਹਾ ਕਿ ਐੱਸ. ਐੱਸ. ਪੀ. ਬਟਾਲਾ ਸੁਹੇਲ ਕਾਸਿਮ ਮੀਰ ਦੇ ਯਤਨਾਂ ਸਦਕਾ ਬਟਾਲਾ ਪੁਲਸ ਵੱਲੋਂ ਇੰਟਰਪੋਲ ’ਤੇ ਵਿਦੇਸ਼ ਬੈਠੇ 5 ਨਾਮੀ ਅਪਰਾਧੀਆਂ/ਗੈਂਗਸਟਰਾਂ ਦੇ ਰੈੱਡ ਕੋਰਨਰ ਨੋਟਿਸ ਪਬਲਿਸ਼ ਕਰਵਾਉਣ ’ਚ ਸਫਲਤਾ ਹਾਸਲ ਕੀਤੀ ਹੈ।
ਉਨ੍ਹਾਂ ਕਿਹਾ ਕਿ ਪਿਛਲੇ ਕੁਝ ਸਾਲਾਂ ਦੌਰਾਨ ਕਈ ਅਪਰਾਧਿਕ ਘਟਨਾਵਾਂ ਦੀ ਕੀਤੀ ਗਈ ਜਾਂਚ ਤੋਂ ਅਪਰਾਧੀਆਂ ਦੇ ਬਦਲਦੇ ਹੋਏ ਖਤਰਨਾਕ ਤੌਰ-ਤਰੀਕੇ ਸਾਹਮਣੇ ਆਏ ਹਨ, ਜਿਸ ਵਿਚ ਸਥਾਨਕ ਗੈਰ-ਸਮਾਜੀ ਅਨਸਰ ਗ੍ਰਨੇਡ ਹਮਲੇ, ਫਿਰੌਤੀ, ਹੱਤਿਆਵਾਂ ਅਤੇ ਗੋਲੀਬਾਰੀ ਦੀਆਂ ਘਟਨਾਵਾਂ ਵਿਚ ਸ਼ਾਮਲ ਰਹੇ ਹਨ। ਅਜਿਹੇ ਅਨਸਰਾਂ ਨੂੰ ਗ੍ਰਿਫਤਾਰ ਕਰ ਕੇ ਜੇਲ ਭੇਜਿਆ ਗਿਆ ਹੈ, ਪ੍ਰੰਤੂ ਮੁੱਖ ਸਾਜਿਸ਼ਕਰਤਾ ਪਹੁੰਚ ਤੋਂ ਬਾਹਰ ਰਹਿ ਕੇ ਵਿਦੇਸ਼ੀ ਧਰਤੀਆਂ ਤੋਂ ਪੰਜਾਬ ਦੇ ਅਮਨ-ਕਾਨੂੰਨ ਨੂੰ ਭੰਗ ਕਰਨ ਲਈ ਆਪਣੀਆਂ ਗਤੀਵਿਧੀਆਂ ਚਲਾ ਰਹੇ ਹਨ।
ਉਨ੍ਹਾਂ ਕਿਹਾ ਕਿ ਰੈੱਡ ਕਾਰਨਰ ਨੋਟਿਸ ਕਈ ਰਾਸਟਰੀ ਤੇ ਅੰਤਰਰਾਸ਼ਟਰੀ ਪੁਲਸ ਏਜੰਸੀਆਂ ਨਾਲ ਪੱਤਰ ਵਿਹਾਰ ਅਤੇ ਸਹਿਯੋਗ ਤੋਂ ਬਾਅਦ ਜਾਰੀ ਹੁੰਦੇ ਹਨ।
ਇਸ ਤਰ੍ਹਾਂ ਪਹਿਲੀ ਸੂਚੀ ਵਿਚ ਬਟਾਲਾ ਪੁਲਸ ਵੱਲੋਂ ਵਿਦੇਸ਼ ਬੈਠੇ ਹੇਠ ਹਰਪ੍ਰੀਤ ਸਿੰਘ ਉਰਫ ਹੈਪੀ ਪਾਸ਼ੀਆਂ, ਜਿਸ ਵਿਰੁੱਧ 25 ਮੁਕੱਦਮੇ ਦਰਜ ਹਨ, ਪਵਿੱਤਰ ਸਿੰਘ ਉਰਫ ਪਵਿੱਤਰ ਚੌੜਾ ਜਿਸ ਵਿਰੁੱਧ 11 ਮੁਕੱਦਮੇ ਦਰਜ ਹਨ, ਹੁਸਨਦੀਪ ਸਿੰਘ ਉਰਫ ਹੁਸਨਾ, ਜਿਸ ਵਿਰੁੱਧ 9 ਮੁਕੱਦਮੇ ਦਰਜ ਹਨ, ਸ਼ਮਸ਼ੇਰ ਸਿੰਘ ਉਰਫ ਹਨੀ, ਜਿਸ ਵਿਰੁੱਧ 5 ਮੁਕੱਦਮੇ ਦਰਜ ਹਨ ਅਤੇ ਹਰੀ ਸਿੰਘ ਉਰਫ ਹੈਰੀ ਨਿੱਝਰ, ਜਿਸ ਵਿਰੁੱਧ 03 ਮੁਕੱਦਮੇ ਦਰਜ ਹਨ ’ਤੇ ਰੈੱਡ ਕਾਰਨਰ ਨੋਟਿਸ ਜਾਰੀ ਕਰਵਾਉਣ ’ਚ ਸਫਲਤਾ ਹਾਸਲ ਕੀਤੀ ਗਈ ਹੈ।
ਐੱਸ. ਪੀ. ਸਹੋਤਾ ਨੇ ਕਿਹਾ ਕਿ ਰੈੱਡ ਕਾਰਨਰ ਨੋਟਿਸ ਅਪਰਾਧੀਆਂ ਦੀ ਗ੍ਰਿਫਤਾਰੀ ਦੇ ਸਬੰਧ ਵਿਚ ਅੰਤਰਰਾਸ਼ਟਰੀ ਪੱਧਰ ’ਤੇ ਇੰਟਰਪੋਲ ’ਤੇ ਜਾਰੀ ਕਰਵਾਏ ਜਾਂਦੇ ਹਨ ਅਤੇ ਇਨ੍ਹਾਂ ਅਪਰਾਧੀਆਂ ਦੀ ਹਵਾਲਗੀ ਅਤੇ ਗ੍ਰਿਫਤਾਰੀ ’ਚ ਸਹਾਈ ਹੁੰਦਾ ਹੈ।
ਉਨ੍ਹਾਂ ਕਿਹਾ ਕਿ ਬਟਾਲਾ ਪੁਲਸ ਸਰਗਰਮੀ ਨਾਲ ਕੇਂਦਰੀ ਏਜੰਸੀਆਂ ਜਿਨ੍ਹਾਂ ’ਚ ਐੱਨ. ਆਈ. ਏ., ਆਈ. ਬੀ., ਸੀ. ਬੀ. ਆਈ. ਤੋਂ ਇਲਾਵਾ ਅੰਤਰਰਾਸ਼ਟਰੀ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੇ ਨਾਲ ਇੰਟਰਪੋਲ ਰਾਹੀਂ ਪੂਰੇ ਸੰਪਰਕ ਵਿਚ ਹੈ।
Read More : ਭਾਰਤ-ਪਾਕਿ ਵਿਵਾਦ