ਥੋਰੋਂਗ ਲਾ ਪਾਸ’ ਸਰ ਕਰ ਕੇ ਬਣਿਆ ਦੁਨੀਆ ਦਾ ਸਭ ਤੋਂ ਛੋਟਾ ਟਰੈਕਰ
ਰੂਪਨਗਰ, 20 ਅਪ੍ਰੈਲ : ਰੋਪੜ ਦੇ ਹੋਣਹਾਰ ਬੱਚੇ ਤੇਗਬੀਰ ਸਿੰਘ ਨੇ ਇਕ ਵਾਰ ਫਿਰ ਵਿਸ਼ਵ ਪੱਧਰ ‘ਤੇ ਪੰਜਾਬ ਦਾ ਨਾਂ ਰੌਸ਼ਨ ਕੀਤਾ ਹੈ। ਸਿਰਫ਼ 7 ਸਾਲ 6 ਮਹੀਨੇ ਦੀ ਉਮਰ ਵਿੱਚ ਤੇਗਬੀਰ ਨੇ ਨੇਪਾਲ ਦੇ ਅੰਨਪੂਰਨਾ ਸਰਕਟ ਦੇ ਸਭ ਤੋਂ ਉੱਚੇ ਬਿੰਦੂ ‘ਥੋਰੋਂਗ ਲਾ ਪਾਸ’ (5416 ਮੀਟਰ/17769 ਫੁੱਟ) ਨੂੰ ਫ਼ਤਿਹ ਕਰਕੇ ਇੱਕ ਨਵਾਂ ਵਿਸ਼ਵ ਰਿਕਾਰਡ ਕਾਇਮ ਕੀਤਾ ਹੈ। ਇਸ ਪ੍ਰਾਪਤੀ ਨਾਲ ਉਹ ਇਸ ਮੁਸ਼ਕਲ ਟਰੈਕ ਨੂੰ ਪੂਰਾ ਕਰਨ ਵਾਲਾ ਦੁਨੀਆ ਦਾ ਸਭ ਤੋਂ ਘੱਟ ਉਮਰ ਦਾ ਵਿਅਕਤੀ ਬਣ ਗਿਆ ਹੈ।
ਚੁਣੌਤੀਆਂ ਨੂੰ ਮਾਤ ਦੇ ਕੇ ਬਣਾਇਆ ਰਿਕਾਰਡ
ਲਗਭਗ 230 ਕਿਲੋਮੀਟਰ ਲੰਬੇ ਇਸ ਔਖੇ ਟਰੈਕ ਦੀ ਸ਼ੁਰੂਆਤ ਤੇਗਬੀਰ ਨੇ 11 ਅਪ੍ਰੈਲ ਨੂੰ ਕੀਤੀ ਅਤੇ 18 ਅਪ੍ਰੈਲ ਨੂੰ ਸਫ਼ਲਤਾਪੂਰਵਕ ਮੰਜ਼ਿਲ ‘ਤੇ ਪਹੁੰਚ ਗਿਆ। ਮਾਈਨਸ ਤਾਪਮਾਨ (-8 ਤੋਂ -13 ਡਿਗਰੀ ਸੈਲਸੀਅਸ), ਘੱਟ ਆਕਸੀਜਨ ਅਤੇ ਤੇਜ਼ ਹਵਾਵਾਂ ਵਰਗੀਆਂ ਕਠਿਨ ਚੁਣੌਤੀਆਂ ਦੇ ਬਾਵਜੂਦ ਉਸਨੇ ਹਿੰਮਤ ਨਹੀਂ ਹਾਰੀ।
18 ਅਪ੍ਰੈਲ ਦੀ ਸਵੇਰ ਨੂੰ 4 ਵਜੇ ਰਵਾਨਾ ਹੋ ਕੇ ਉਹ ਕਰੀਬ 5.30 ਘੰਟਿਆਂ ਦੀ ਚੜ੍ਹਾਈ ਤੋਂ ਬਾਅਦ ਸਵੇਰੇ 9:25 ਵਜੇ ਥੋਰੋਂਗ ਲਾ ਪਾਸ ‘ਤੇ ਪਹੁੰਚਿਆ। ਇਸ ਦੇ ਨਾਲ ਹੀ ਉਸਨੇ ਅਪ੍ਰੈਲ 2025 ਵਿੱਚ ਦੁਬਈ ਦੇ ਇਵਾਨ ਕ੍ਰੁਸ਼ਕੋਵ ਵੱਲੋਂ ਬਣਾਏ ਗਏ 7 ਸਾਲ 10 ਮਹੀਨੇ ਦੇ ਪਿਛਲੇ ਰਿਕਾਰਡ ਨੂੰ ਪਿੱਛੇ ਛੱਡ ਦਿੱਤਾ।
ਸਖ਼ਤ ਮਿਹਨਤ ਤੇ ਅਨੁਸ਼ਾਸਿਤ ਤਿਆਰੀ
ਸ਼ਿਵਾਲਿਕ ਪਬਲਿਕ ਸਕੂਲ, ਰੋਪੜ ਦੀ ਤੀਜੀ ਜਮਾਤ ਦੇ ਵਿਦਿਆਰਥੀ ਤੇਗਬੀਰ ਨੇ ਇਸ ਪ੍ਰਾਪਤੀ ਲਈ 6 ਮਹੀਨੇ ਤੱਕ ਸਖ਼ਤ ਮਿਹਨਤ ਕੀਤੀ। ਉਸ ਦੇ ਪਿਤਾ ਸੁਖਿੰਦਰਦੀਪ ਸਿੰਘ ਨੇ ਦੱਸਿਆ ਕਿ ਸੇਵਾਮੁਕਤ ਕੋਚ ਸਰਦਾਰ ਬਿਕਰਮਜੀਤ ਸਿੰਘ ਘੁੰਮਣ ਦੀ ਨਿਗਰਾਨੀ ਹੇਠ ਉਸਨੇ ਵਿਸ਼ੇਸ਼ ਸਿਖਲਾਈ ਲਈ, ਜਿਸ ਵਿੱਚ ਦਿਲ ਅਤੇ ਫੇਫੜਿਆਂ ਦੀ ਸਮਰੱਥਾ ਵਧਾਉਣ ਵਾਲੀਆਂ ਕਸਰਤਾਂ ਸ਼ਾਮਲ ਸਨ। ਉਸਦੀ ਮਾਤਾ ਡਾ. ਮਨਪ੍ਰੀਤ ਕੌਰ ਨੇ ਦੱਸਿਆ ਕਿ ਤੇਗਬੀਰ ਨੇ ਇਸ ਯਾਤਰਾ ਦੌਰਾਨ ਇੱਕ ਸਖ਼ਤ ਡਾਇਟ ਪਲਾਨ ਅਤੇ ਸੰਤੁਲਿਤ ਖ਼ੁਰਾਕ ਦੀ ਪਾਲਣਾ ਕੀਤੀ।
ਪਹਿਲਾਂ ਵੀ ਕਈ ਰਿਕਾਰਡਾਂ ‘ਤੇ ਜਮਾਇਆ ਕਬਜ਼ਾ
ਤੇਗਬੀਰ ਦੀਆਂ ਇਹ ਉਪਲਬਧੀਆਂ ਏਸ਼ੀਆ ਬੁੱਕ ਆਫ਼ ਰਿਕਾਰਡਜ਼ ਅਤੇ ਇੰਡੀਆ ਬੁੱਕ ਆਫ਼ ਰਿਕਾਰਡਜ਼ ਵਿੱਚ ਦਰਜ ਹਨ। ਉਸ ਦੇ ਪਿਛਲੇ ਸ਼ਾਨਦਾਰ ਰਿਕਾਰਡ ਇਸ ਪ੍ਰਕਾਰ ਹਨ:
ਜੂਨ 2025: 6 ਸਾਲ 7 ਮਹੀਨੇ ਦੀ ਉਮਰ ਵਿੱਚ ਮਾਊਂਟ ਐਲਬਰਸ ਸਰ ਕਰਨ ਵਾਲਾ ਸਭ ਤੋਂ ਛੋਟਾ ਵਿਅਕਤੀ।
ਅਗਸਤ 2024: ਮਾਊਂਟ ਕਿਲੀਮੰਜਾਰੋ ਫ਼ਤਿਹ ਕਰਨ ਵਾਲਾ ਸਭ ਤੋਂ ਘੱਟ ਉਮਰ ਦਾ ਏਸ਼ੀਆਈ।
ਅਪ੍ਰੈਲ 2024: 5 ਸਾਲ 7 ਮਹੀਨੇ ਦੀ ਉਮਰ ਵਿੱਚ ਮਾਊਂਟ ਐਵਰੈਸਟ ਬੇਸ ਕੈਂਪ ਤੱਕ ਪਹੁੰਚ।
ਤੇਗਬੀਰ 20 ਅਪ੍ਰੈਲ ਤੱਕ ਆਪਣੀ ਵਾਪਸੀ ਯਾਤਰਾ ਪੂਰੀ ਕਰਕੇ ਕਾਠਮੰਡੂ ਪਹੁੰਚੇਗਾ ਅਤੇ 22 ਅਪ੍ਰੈਲ ਨੂੰ ਘਰ ਵਾਪਸ ਆਵੇਗਾ। ਇਹ ਪ੍ਰਾਪਤੀ ਸਿਰਫ਼ ਰੋਪੜ ਲਈ ਹੀ ਨਹੀਂ, ਸਗੋਂ ਪੂਰੇ ਪੰਜਾਬ ਲਈ ਇੱਕ ਮਾਣਮੱਤੀ ਘਟਨਾ ਹੈ।