ਰਾਹੁਲ ਗਾਂਧੀ ਰਿਪੋਰਟਰ ਬਣ ਕੇ ਪੁੱਛੇ ਸਵਾਲ
ਨਵੀਂ ਦਿੱਲੀ,10 ਦਸੰਬਰ–ਬੀਤੇ ਦਿਨ ਸੰਸਦ ’ਚ ਰਾਹੁਲ ਗਾਂਧੀ ਰਿਪੋਰਟਰ ਦੀ ਭੂਮਿਕਾ ਵਿਚ ਨਜ਼ਰ ਆਏ। ਵਿਰੋਧੀ ਧਿਰ ਦੇ 2 ਸੰਸਦ ਮੈਂਬਰਾਂ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਗੌਤਮ ਅਡਾਨੀ ਦਾ ਮੁਖੌਟਾ ਲਾਇਆ ਅਤੇ ਰਾਹੁਲ ਨਾਲ ਗੱਲਬਾਤ ਕੀਤੀ। ਰਾਹੁਲ ਨੇ ਮੋਦੀ-ਅਡਾਨੀ ਦੇ ਸਬੰਧ, ਅਮਿਤ ਸ਼ਾਹ ਦੀ ਭੂਮਿਕਾ ਅਤੇ ਸੰਸਦ ਨਾ ਚੱਲਣ ’ਤੇ ਲੱਗਭਗ 8 ਸਵਾਲ ਪੁੱਛੇ।
ਕਾਂਗਰਸ ਨੇ 1.19 ਮਿੰਟ ਦੀ ਗੱਲਬਾਤ ਦੀ ਵੀਡੀਓ ਸਾਂਝੀ ਕੀਤੀ ਹੈ। ਕਾਂਗਰਸ ਦੇ ਸੰਸਦ ਮੈਂਬਰ ਮਨਿਕਮ ਟੈਗੋਰ ਨੇ ਗੌਤਮ ਅਡਾਨੀ ਅਤੇ ਰਾਕਾਂਪਾ (ਸ਼ਰਦ ਪਵਾਰ) ਦੇ ਸੰਸਦ ਮੈਂਬਰ ਸ਼ਿਵਾਜੀ ਰਾਓ ਆਢਲ ਰਾਓ ਪਾਟਿਲ ਨੇ ਪ੍ਰਧਾਨ ਮੰਤਰੀ ਮੋਦੀ ਦਾ ਮੁਖੌਟਾ ਲਾਇਆ। ਰਾਹੁਲ ਨੇ ਸਵਾਲ ਕੀਤਾ ਕਿ ਅੱਜਕਲ ਕੀ ਹੋ ਰਿਹਾ ਹੈ ਭਰਾ? ਜਵਾਬ ਵਿਚ ਅਡਾਨੀ ਦਾ ਮੁਖੌਟਾ ਲਾਏ ਸੰਸਦ ਮੈਂਬਰ ਨੇ ਮੋਦੀ ਦਾ ਮੁਖੌਟਾ ਲਾਏ ਸੰਸਦ ਦੀ ਪਿੱਠ ਠੋਕੀ ਅਤੇ ਕਿਹਾ ਕਿ ਅੱਜਕਲ ਮੈਂ ਜੋ ਵੀ ਬੋਲਦਾ ਹਾਂ, ਇਹ ਕਰਦਾ ਹੈ।
ਰਾਹੁਲ ਦੇ ਅਗਲੇ ਸਵਾਲ-ਤੁਸੀਂ ਕੀ ਚਾਹੁੰਦੇ ਹੋ? ਦੇ ਜਵਾਬ ਵਿਚ ਅਡਾਨੀ ਦਾ ਮੁਖੌਟਾ ਲਾਏ ਸੰਸਦ ਮੈਂਬਰ ਨੇ ਕਿਹਾ ਕਿ ਉਸਨੂੰ ਏਅਰਪੋਰਟ ਚਾਹੀਦਾ ਹੈ… ਕੁਝ ਵੀ ਚਾਹੀਦਾ ਹੈ। ਇਸ ’ਤੇ ਰਾਹੁਲ ਅਤੇ ਮੌਜੂਦ ਸੰਸਦ ਮੈਂਬਰ ਹੱਸਣ ਲੱਗੇ। ਨਾਲ ਖੜ੍ਹੇ ਇਕ ਹੋਰ ਸੰਸਦ ਮੈਂਬਰ ਨੇ ਕਿਹਾ, ਭਰਾ! ਇਹ ਪਾਰਲੀਮੈਂਟ ਨੂੰ ਛੱਡ ਦੇਣਾ… ਇਸ ’ਤੇ ਅਡਾਨੀ ਦਾ ਮੁਖੌਟਾ ਲਾਏ ਸੰਸਦ ਮੈਂਬਰ ਨੇ ਕਿਹਾ-ਦੇਖਦੇ ਹਾਂ।