ਸ਼ਿਮਰੋਨ ਹੇਟਮਾਇਰ ਦਾ ਤੂਫ਼ਾਨੀ ਅਰਧ ਸੈਂਕੜਾ: ਵਾਨਖੇੜੇ ‘ਚ ਬਣਿਆ ਵਿਸ਼ਵ ਰਿਕਾਰਡ
ਮੁੰਬਈ, 24 ਫਰਵਰੀ : ਟੀ-20 ਵਿਸ਼ਵ ਕੱਪ ਦੇ ਚੌਥੇ ‘ਸੁਪਰ-8’ ਮੁਕਾਬਲੇ ਵਿੱਚ ਵੈਸਟਇੰਡੀਜ਼ ਨੇ ਆਪਣੀ ਧਾਕੜ ਖੇਡ ਦਾ ਪ੍ਰਦਰਸ਼ਨ ਕਰਦਿਆਂ ਜ਼ਿੰਬਾਬਵੇ ਨੂੰ 107 ਦੌੜਾਂ ਦੇ ਵੱਡੇ ਫਰਕ ਨਾਲ ਕਰਾਰੀ ਸ਼ਿਕਸਤ ਦਿੱਤੀ। ਮੁੰਬਈ ਦੇ ਇਤਿਹਾਸਕ ਵਾਨਖੇੜੇ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਜ਼ਿੰਬਾਬਵੇ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਦਾ ਫੈਸਲਾ ਕੀਤਾ, ਜੋ ਕਿ ਵੈਸਟਇੰਡੀਜ਼ ਦੇ ਬੱਲੇਬਾਜ਼ਾਂ ਨੇ ਗਲਤ ਸਾਬਤ ਕਰ ਦਿੱਤਾ। ਵੈਸਟਇੰਡੀਜ਼ ਨੇ ਨਿਰਧਾਰਿਤ 20 ਓਵਰਾਂ ਵਿੱਚ 6 ਵਿਕਟਾਂ ਦੇ ਨੁਕਸਾਨ ‘ਤੇ 254 ਦੌੜਾਂ ਦਾ ਪਹਾੜ ਵਰਗਾ ਸਕੋਰ ਖੜ੍ਹਾ ਕੀਤਾ।
ਜ਼ਿੰਬਾਬਵੇ ਦੀ ਪਾਰੀ : 255 ਦੌੜਾਂ ਦੇ ਵਿਸ਼ਾਲ ਟੀਚੇ ਦਾ ਪਿੱਛਾ ਕਰਦਿਆਂ ਜ਼ਿੰਬਾਬਵੇ ਦੀ ਟੀਮ ਦਬਾਅ ਹੇਠ ਬਿਖਰ ਗਈ ਅਤੇ 17.4 ਓਵਰਾਂ ਵਿੱਚ ਮਹਿਜ਼ 147 ਦੌੜਾਂ ‘ਤੇ ਹੀ ਆਲ ਆਊਟ ਹੋ ਗਈ।
ਹੇਟਮਾਇਰ ਦੀ ‘ਪਲੇਅਰ ਆਫ਼ ਦ ਮੈਚ’ ਪਾਰੀ : ਵੈਸਟਇੰਡੀਜ਼ ਦੇ ਸ਼ਿਮਰੋਨ ਹੇਟਮਾਇਰ ਨੇ ਮਹਿਜ਼ 19 ਗੇਂਦਾਂ ਵਿੱਚ ਅਰਧ ਸੈਂਕੜਾ ਜੜ ਕੇ ਇਤਿਹਾਸ ਰਚ ਦਿੱਤਾ। ਇਹ ਕਿਸੇ ਵੀ ਵੈਸਟਇੰਡੀਜ਼ ਖਿਡਾਰੀ ਵੱਲੋਂ ਵਿਸ਼ਵ ਕੱਪ ਵਿੱਚ ਸਭ ਤੋਂ ਤੇਜ਼ ਫਿਫਟੀ ਹੈ। ਉਨ੍ਹਾਂ ਨੇ ਕ੍ਰਿਸ ਗੇਲ (23 ਗੇਂਦਾਂ, 2012) ਦਾ ਰਿਕਾਰਡ ਤੋੜਿਆ। ਹੇਟਮਾਇਰ ਨੇ ਇਸ ਤੋਂ ਪਹਿਲਾਂ ਸਕਾਟਲੈਂਡ ਵਿਰੁੱਧ ਈਡਨ ਗਾਰਡਨ ਵਿੱਚ ਵੀ 22 ਗੇਂਦਾਂ ‘ਚ ਅਰਧ ਸੈਂਕੜਾ ਲਗਾਇਆ ਸੀ।
ਛੱਕਿਆਂ ਦਾ ਨਵਾਂ ਵਿਸ਼ਵ ਰਿਕਾਰਡ : ਇਸ ਮੈਚ ਵਿੱਚ ਕੁੱਲ 31 ਛੱਕੇ ਮਾਰੇ ਗਏ, ਜੋ ਟੀ-20 ਵਿਸ਼ਵ ਕੱਪ ਦੇ ਇਤਿਹਾਸ ਵਿੱਚ ਇੱਕ ਨਵਾਂ ਕੀਰਤੀਮਾਨ ਹੈ। ਇਸ ਤੋਂ ਪਹਿਲਾਂ 2014 ਵਿੱਚ ਆਇਰਲੈਂਡ ਅਤੇ ਨੀਦਰਲੈਂਡ ਦੇ ਮੈਚ ਵਿੱਚ 30 ਛੱਕੇ ਲੱਗੇ ਸਨ।
ਆਖਰੀ ਵਿਕਟ ਦੀ ਸਭ ਤੋਂ ਵੱਡੀ ਸਾਂਝੇਦਾਰੀ : ਜ਼ਿੰਬਾਬਵੇ ਦੇ ਬ੍ਰੈਡਲੀ ਇਵਾਨਸ ਅਤੇ ਰਿਚਰਡ ਨਗਾਰਾਵਾ ਨੇ 10ਵੀਂ ਵਿਕਟ ਲਈ 19 ਗੇਂਦਾਂ ਵਿੱਚ 44 ਦੌੜਾਂ ਜੋੜ ਕੇ ਨਵਾਂ ਰਿਕਾਰਡ ਬਣਾਇਆ। ਉਨ੍ਹਾਂ ਨੇ ਵੈਸਟਇੰਡੀਜ਼ ਦੇ ਗੁਡਾਕੇਸ਼ ਮੋਤੀ ਅਤੇ ਸ਼ੇਰਫੇਨ ਰਦਰਫੋਰਡ (37 ਦੌੜਾਂ, 2024) ਦਾ ਰਿਕਾਰਡ ਪਿੱਛੇ ਛੱਡ ਦਿੱਤਾ।
ਬ੍ਰਾਇਨ ਬੇਨੇਟ ਦਾ ਸ਼ਾਨਦਾਰ ਸਫ਼ਰ : ਜ਼ਿੰਬਾਬਵੇ ਦੇ ਓਪਨਰ ਬ੍ਰਾਇਨ ਬੇਨੇਟ 5 ਦੌੜਾਂ ਬਣਾ ਕੇ ਆਊਟ ਹੋਏ। ਖਾਸ ਗੱਲ ਇਹ ਰਹੀ ਕਿ ਇਸ ਟੂਰਨਾਮੈਂਟ ਵਿੱਚ ਇਹ ਉਨ੍ਹਾਂ ਦਾ ਪਹਿਲਾ ਆਊਟ ਸੀ। ਉਨ੍ਹਾਂ ਨੇ ਬਿਨਾਂ ਆਊਟ ਹੋਏ 180 ਦੌੜਾਂ ਬਣਾਈਆਂ ਅਤੇ ਨੀਦਰਲੈਂਡ ਦੇ ਟੌਮ ਕੂਪਰ (111 ਦੌੜਾਂ) ਦਾ ਰਿਕਾਰਡ ਤੋੜਿਆ।
ਨਿਕੋਲਸ ਪੂਰਨ ਦੇ ਰਿਕਾਰਡ ਦੀ ਬਰਾਬਰੀ : ਹੇਟਮਾਇਰ ਨੇ ਇਸ ਮੈਚ ਵਿੱਚ 7 ਛੱਕੇ ਲਗਾਏ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਇੱਕੋ ਵਿਸ਼ਵ ਕੱਪ ਐਡੀਸ਼ਨ ਵਿੱਚ ਨਿਕੋਲਸ ਪੂਰਨ ਦੇ 17 ਛੱਕਿਆਂ ਦੇ ਰਿਕਾਰਡ ਦੀ ਬਰਾਬਰੀ ਕਰ ਲਈ ਹੈ।
Read More : ਸਾਲ 2026-27 ‘ਚ ਪੰਜਾਬ ਦਾ ਆਬਕਾਰੀ ਮਾਲੀਆ 12,800 ਕਰੋੜ ਰੁਪਏ ਤੱਕ ਪਹੁੰਚੇਗਾ : ਚੀਮਾ