ਰਾਂਚੀ, 30 ਨਵੰਬਰ : ਐਤਵਾਰ ਨੂੰ ਰਾਂਚੀ ਦੇ ਜੇਐਸਸੀਏ ਇੰਟਰਨੈਸ਼ਨਲ ਸਟੇਡੀਅਮ ਕੰਪਲੈਕਸ ਵਿੱਚ ਖੇਡੇ ਗਏ ਮੈਚ ਵਿਚ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ (135) ਨੇ ਵਨ ਡੇ ਵਿਚ 52ਵਾਂ ਸੈਂਕੜਾ ਲਾਇਆ। ਇਸ ਤਰ੍ਹਾਂ ਉਹ ਕਿਸੇ ਇਕ ਰੂਪ ਵਿਚ ਸਭ ਤੋਂ ਵੱਧ ਸੈਂਕੜੇ ਲਾਉਣ ਵਾਲਾ ਬੱਲੇਬਾਜ਼ ਬਣ ਗਿਆ ਹੈ।
ਸਚਿਨ ਤੇਂਦੁਲਕਰ ਦੇ ਨਾਂ ਟੈਸਟ ਵਿਚ ਸਭ ਤੋਂ ਵੱਧ 51 ਸੈਂਕੜੇ ਹਨ ਜਦਕਿ ਟੀ-20 ਵਿਚ ਰੋਹਿਤ ਸ਼ਰਮਾ 5 ਸੈਂਕੜਿਆਂ ਨਾਲ ਸਭ ਤੋਂ ਉੱਪਰ ਹੈ। ਵਿਰਾਟ ਦਾ ਆਲਓਵਰ ਇਹ 83ਵਾਂ ਸੈਂਕੜਾ ਹੈ। ਉਸਦੇ ਨਾਂ ਟੈਸਟ ਵਿਚ 30 ਜਦਕਿ ਟੀ-20 ਵਿਚ 1 ਸੈਂਕੜਾ ਦਰਜ ਹੈ।
ਵਿਰਾਟ ਨੇ ਅੱਜ ਇੱਥੇ ਦੱਖਣੀ ਅਫਰੀਕਾ ਵਿਰੁੱਧ 3 ਮੈਚਾਂ ਦੀ ਵਨ ਡੇ ਸੀਰੀਜ਼ ਦੇ ਪਹਿਲੇ ਮੁਕਾਬਲੇ ਵਿਚ ਖੇਡਦੇ ਹੋਏ ਆਪਣੀ ਪਾਰੀ ਦੌਰਾਨ 120 ਗੇਂਦਾਂ ਦੀ ਪਾਰੀ ਵਿਚ 11 ਚੌਕੇ ਤੇ 7 ਛੱਕੇ ਲਾਏ। ਇਸ ਦੌਰਾਨ ਵਿਰਾਟ ਨੇ ਦੱਖਣੀ ਅਫਰੀਕਾ ਵਿਰੁੱਧ ਕਿਸੇ ਬੱਲੇਬਾਜ਼ ਵੱਲੋਂ ਸਭ ਤੋਂ ਵੱਧ ਸੈਂਕੜੇ ਲਾਉਣ ਦਾ ਰਿਕਾਰਡ ਵੀ ਆਪਣੇ ਨਾਂ ਕਰ ਲਿਆ। ਉਸ ਦੇ ਹੁਣ ਇਸ ਟੀਮ ਵਿਰੁੱਧ 6 ਸੈਂਕੜੇ ਹੋ ਗਏ ਹਨ ਤੇ ਇਸਦੇ ਨਾਲ ਹੀ ਉਸ ਨੇ ਡੇਵਿਡ ਵਾਰਨਰ (5) ਤੇ ਸਚਿਨ ਤੇਂਦੁਲਕਰ (5) ਨੂੰ ਪਿੱਛੇ ਛੱਡਿਆ।
52ਵੀਂ ਵਾਰ ਵਿਰਾਟ-ਰੋਹਿਤ ਨੇ ਕੀਤੀ 50+ ਦੀ ਸਾਂਝੇਦਾਰੀ
ਰੋਹਿਤ ਸ਼ਰਮਾ ਤੇ ਵਿਰਾਟ ਕੋਹਲੀ ਨੇ ਵਨ ਡੇ ਵਿਚ 52ਵੀਂ ਵਾਰ 50+ ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਰਿਕਾਰਡ ਸੌਰਭ ਗਾਂਗੁਲੀ ਤੇ ਸਚਿਨ ਤੇਂਦੁਲਕਰ ਦੇ ਨਾਂ ਹੈ, ਜਿਨ੍ਹਾਂ ਨੇ 83 ਵਾਰ 50+ ਦੀ ਸਾਂਝੇਦਾਰੀ ਕੀਤੀ ਹੈ। ਉਨ੍ਹਾਂ ਤੋਂ ਬਾਅਦ ਸਚਿਨ ਤੇ ਰਾਹੁਲ ਦ੍ਰਾਵਿੜ ਦੀ ਜੋੜੀ 74 ਵਾਰ ਜਦਕਿ ਗੌਤਮ ਗੰਭੀਰ ਤੇ ਵਰਿੰਦਰ ਸਹਿਵਾਗ 53 ਵਾਰ ਇਹ ਕਾਰਨਾਮਾ ਕਰ ਚੁੱਕੇ ਹਨ।
ਵਨ ਡੇ ’ਚ ਸਿਕਸਰ ਕਿੰਗ ਬਣਿਆ ਰੋਹਿਤ ਸ਼ਰਮਾ
ਸਾਬਕਾ ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ ਵਨ ਡੇ ਵਿਚ ਸਭ ਤੋਂ ਵੱਧ ਛੱਕੇ ਲਾਉਣ ਵਾਲਾ ਬੱਲੇਬਾਜ਼ ਬਣ ਗਿਆ ਹੈ। ਉਸ ਨੇ ਪਾਕਿਸਤਾਨੀ ਕ੍ਰਿਕਟਰ ਸ਼ਾਹਿਦ ਅਫਰੀਦੀ (398 ਮੈਚਾਂ ਵਿਚ 351 ਛੱਕੇ) ਨੂੰ ਪਛਾੜਿਆ। ਰੋਹਿਤ ਦੇ ਹੁਣ 277 ਮੈਚਾਂ ਵਿਚ 352 ਛੱਕੇ ਹੋ ਗਏ ਹਨ। ਰੋਹਿਤ ਨੇ ਅੱਜ ਇੱਥੇ ਆਪਣੀ 57 ਦੌੜਾਂ ਦੀ ਪਾਰੀ ਦੌਰਾਨ 5 ਚੌਕੇ ਤੇ 3 ਸ਼ਾਨਦਾਰ ਛੱਕੇ ਲਾਏ।
Read More : ਵਿਆਹ ਵਿਚ ਚੱਲੀਆਂ ਗੋਲੀਆਂ, 2 ਲੋਕਾਂ ਦੀ ਮੌਤ