ਸਮਾਨ ਨਾਲ ਭਰਿਆ ਟਰੱਕ ਦੁਕਾਨ ਦੇ ਬਾਹਰ ਬੈਠੇ ਪਰਿਵਾਰ ’ਤੇ ਜਾ ਚੜਿਆ
ਭਵਾਨੀਗੜ੍ਹ, 14 ਸਤੰਬਰ : ਜ਼ਿਲਾ ਸੰਗਰੂਰ ਦੇ ਭਵਾਨੀਗੜ੍ਹ ਤੋਂ ਸਮਾਣਾ ਰੋਡ ਉਪਰ ਪਿੰਡ ਗਾਜੇਵਾਸ ਵਿਖੇ ਵਾਪਰੇ ਇਕ ਭਿਆਨਕ ਹਾਦਸੇ ’ਚ 2 ਭੈੌਣਾਂ ਦੀ ਮੌਤ ਹੋ ਗਈ। ਜਦਕਿ ਮਾਂ ਗੰਭੀਰ ਜ਼ਖ਼ਮੀ ਹੋ ਗਈ, ਜਿਸਨੂੰ ਇਲਾਜ ਦੇ ਲਈ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ।
ਇਸ ਘਟਨਾ ਸਬੰਧੀ ਜਾਣਕਾਰੀ ਦਿੰਦਿਆਂ ਰਾਜਪਾਲ ਸਿੰਘ ਪੁੱਤਰ ਜੇਠੂ ਸਿੰਘ ਵਾਸੀ ਪਿੰਡ ਨਰੈਣਗੜ੍ਹ ਨੇ ਦੱਸਿਆ ਕਿ ਉਹ ਅੱਜ ਆਪਣੀ ਪਤਨੀ ਬਲਜਿੰਦਰ ਕੌਰ, ਲੜਕੀ ਜਸਦੀਪ ਕੌਰ (24) ਅਤੇ ਇਕ ਹੋਰ ਛੋਟੀ ਬੱਚੀ ਹਰਨਾਜ ਕੌਰ (5) ਨੂੰ ਲੈ ਕੇ ਆਪਣੇ ਮੋਟਰਸਾਈਕਲ ਰਾਹੀ ਪਿੰਡ ਨਮਾਦਾ ਵਿਖੇ ਸਥਿਤ ਗੱਗਾਮਾੜੀ ’ਤੇ ਅੱਜ ਸ਼ੁਰੂ ਹੋਏ ਮੇਲੇ ਦੌਰਾਨ ਮੱਥਾ ਟੇਕਣ ਲਈ ਗਿਆ ਸੀ ਤਾਂ ਇਸ ਦੌਰਾਨ ਸਮਾਣਾ ਰੋਡ ਉਪਰ ਪਿੰਡ ਗਾਜੇਵਾਸ ਵਿਖੇ ਪੁਲਿਸ ਚੌਕੀ ਨੇੜੇ ਅਚਾਨਕ ਉਸ ਦੇ ਮੋਟਰਸਾਇਕਲ ਦਾ ਟਾਇਰ ਪੈਂਚਰ ਹੋ ਗਿਆ ਤੇ ਉਸ ਨੇ ਆਪਣੀ ਪਤਨੀ ਤੇ ਦੋਵੇ ਲੜਕੀਆਂ ਨੂੰ ਇਥੇ ਸੜਕ ਕਿਨਾਰੇ ਸਥਿਤ ਇਕ ਦੁਕਾਨ ਗੁਰੂ ਨਾਨਕ ਫਰਨੀਚਰ ਵਰਕਸ ਦੇ ਬਾਹਰ ਬਿਠਾ ਦਿੱਤਾ ਅਤੇ ਖੁਦ ਮੋਟਰਸਾਈਕਲ ਨੂੰ ਪੈਂਚਰ ਲਗਾਉਣ ਲਈ ਅੱਗੇ ਚਲਾ ਗਿਆ।
ਰਾਜਪਾਲ ਸਿੰਘ ਨੇ ਦੱਸਿਆ ਕਿ ਇਸ ਦੌਰਾਨ ਸਮਾਣਾ ਸਾਇਡ ਤੋਂ ਸਮਾਨ ਨਾਲ ਭੱਰਿਆ ਇਕ ਵੱਡਾ ਟਰੱਕ ਆਇਆ ਅਤੇ ਇਹ ਟਰੱਕ ਟਰਾਲਾ ਅਚਾਨਕ ਬੇਕਾਬੂ ਹੋ ਕੇ ਸੜਕ ਕਿਨਾਰੇ ਲੱਗੇ ਇਕ ਬਿਜਲੀ ਸਪਲਾਈ ਵਾਲੇ ਟ੍ਰਾਂਸਫਾਰਮਰ ਨੂੰ ਤੋੜਦਾ ਹੋਇਆ ਦੁਕਾਨ ਦੇ ਬਾਹਰ ਬੈਠੇ ਉਸਦੇ ਪਰਿਵਾਰਕ ਮੈਂਬਰਾਂ ’ਤੇ ਜਾ ਚੜਿਆ ਅਤੇ ਇਸ ਦਰਦਨਾਕ ਅਤੇ ਭਿਆਨਕ ਹਾਦਸੇ ’ਚ ਉਸ ਦੀ ਲੜਕੀ ਜਸਦੀਪ ਕੌਰ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਅਤੇ ਉਸ ਦੀ ਪਤਨੀ ਬਲਜਿੰਦਰ ਕੌਰ ਅਤੇ ਇਕ ਹੋਰ ਛੋਟੀ ਬੱਚੀ ਹਰਨਾਜ ਕੌਰ ਗੰਭੀਰ ਰੂਪ ‘ਚ ਜਖ਼ਮੀ ਹੋ ਗਈਆਂ, ਜਿਨ੍ਹਾਂ ਨੂੰ ਇਲਾਜ਼ ਲਈ ਸਮਾਣਾ ਦੇ ਹਸਪਤਾਲ ਵਿਖੇ ਲਿਜਾਇਆ ਗਿਆ। ਜਿਥੋਂ ਇਨ੍ਹਾਂ ਨੂੰ ਮੁੱਢਲੀ ਸਹਾਇਤਾ ਦੇਣ ਤੋਂ ਬਾਅਦ ਪਟਿਆਲਾ ਵਿਖੇ ਰੈਫ਼ਰ ਕਰ ਦਿੱਤਾ ਗਿਆ।
ਰਾਜਪਾਲ ਸਿੰਘ ਨੇ ਦੱਸਿਆ ਕਿ ਜ਼ਖ਼ਮਾਂ ਦੀ ਤਾਬ ਨਾ ਝਲਦਿਆਂ ਛੋਟੀ ਬੱਚੀ ਹਰਨਾਜ ਕੌਰ ਨੇ ਵੀ ਪਟਿਆਲਾ ਵਿਖੇ ਪਹੁੰਚ ਕੇ ਦਮ ਤੋੜ ਦਿੱਤਾ। ਇਸ ਹਾਦਸੇ ’ਚ ਟਰੱਕ ਦਾ ਕੰਡਕਟਰ ਅਤੇ ਇਕ ਨੌਜਵਾਨ ਵੀ ਗੰਭੀਰ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਨੂੰ ਇਲਾਜ ਲਈ ਸਮਾਣਾ ਦੇ ਹਸਪਤਾਲ ਵਿਖੇ ਦਾਖਲ ਕਰਵਾਇਆ ਗਿਆ।
Read More : ਅਕਾਲੀ ਆਗੂ ਕੇਪੀ ਦੇ ਇਕਲੌਤੇ ਪੁੱਤਰ ਦੀ ਹਾਦਸੇ ਵਿਚ ਮੌਤ