ਫਰੀਦਕੋਟ, 15 ਨਵੰਬਰ : ਪੁਲਸ ਨੇ ਕੁਝ ਘੰਟਿਆਂ ’ਚ ਹੀ ਬਲੈਕਮੇਲਿੰਗ ਕਰ ਕੇ 8 ਲੱਖ ਰੁਪਏ ਵਸੂਲਣ ਦੇ ਮਾਮਲੇ ’ਚ 3 ਔਰਤਾਂ ਸਮੇਤ 6 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।
ਇਹ ਜਾਣਕਾਰੀ ਜੋਗੇਸ਼ਵਰ ਸਿੰਘ ਐੱਸ. ਪੀ. (ਇਨਵੈਸਟੀਗੇਸ਼ਨ) ਨੇ ਦਿੰਦਿਆ ਕਿਹਾ ਕਿ ਗ੍ਰਿਫਤਾਰ ਮੁਲਜ਼ਮਾਂ ਦੀ ਪਛਾਣ ਹਰਨੀਤ ਸਿੰਘ ਵਾਸੀ ਘੁੱਦੂਵਾਲਾ, ਰਾਜਵਿੰਦਰ ਸਿੰਘ ਉਰਫ ਪੱਪੂ ਸਿਮਰੇਵਾਲਾ, ਵਰਿੰਦਰ ਸਿੰਘ ਵਾਸੀ ਪਿੰਡ ਸੰਗਤਪੁਰਾ, ਪਰਮਜੀਤ ਕੌਰ ਵਾਸੀ ਪਿੰਡ ਪਹਿਲੂਵਾਲਾ, ਲਵਪ੍ਰੀਤ ਕੌਰ ਵਾਸੀ ਫਰੀਦਕੋਟ ਅਤੇ ਨਵਦੀਪ ਕੌਰ ਵਾਸੀ ਹੀਰਾ ਸਿੰਘ ਨਗਰ ਕੋਟਕਪੂਰਾ ਵਜੋਂ ਹੋਈ ਹੈ। ਪੁਲਸ ਪਾਰਟੀ ਨੇ ਮੁਲਜ਼ਮਾਂ ਤੋਂ 8 ਲੱਖ ਰੁਪਏ ਦੀ ਨਕਦੀ ਵੀ ਬਰਾਮਦ ਕਰ ਲਈ ਹੈ।
ਉਨ੍ਹਾਂ ਦੱਸਿਆ ਕਿ ਪੁਲਸ ਦੇ ਧਿਆਨ ’ਚ ਆਇਆ ਸੀ ਕਿ ਇਕ ਕਾਰੋਬਾਰੀ, ਜੋ ਕਿ ਆਸ਼ਰਮ ਦੇ ਟਰੱਸਟ ਦਾ ਮੈਂਬਰ ਹੈ, ਨੂੰ 9 ਨਵੰਬਰ ਨੂੰ ਇਕ ਔਰਤ ਦੀ ਕਾਲ ਆਈ ਸੀ, ਜਿਸ ਨੇ ਕਿਹਾ ਕਿ ਤੁਹਾਡੇ ਆਸ਼ਰਮ ’ਚ ਗਲਤ ਕੰਮ ਹੁੰਦੇ ਹਨ, ਜਿਸ ਦੇ ਮੇਰੇ ਕੋਲ ਸਬੂਤ ਹਨ। ਤੁਸੀਂ ਮੈਨੂੰ ਡੈਂਟਲ ਕਾਲਜ ਦੇ ਨੇੜੇ ਆ ਕੇ ਮਿਲੋ। ਮੁੱਦਈ ਉਸ ਔਰਤ ਨੂੰ ਮਿਲਣ ਚਲਾ ਗਿਆ।
ਇਸ ਦੌਰਾਨ ਮੁੱਦਈ ਦੀ ਗੱਡੀ ’ਚ ਮੁਲਜ਼ਮ ਨਵਦੀਪ ਕੌਰ ਬੈਠ ਗਈ। ਮੁੱਦਈ ਨੇ ਕਿਹਾ ਕਿ ਆਸ਼ਰਮ ਬਾਰੇ ਕੀ ਸਬੂਤ ਹੈ ਤਾਂ ਉਸ ਨੇ ਕਿਹਾ ਕਿ ਮੇਰੇ ਕੋਲ ਕੋਈ ਸਬੂਤ ਨਹੀਂ ਹੈ, ਮੇਰਾ ਬਾਹਰ ਦਾ ਵੀਜ਼ਾ ਲੱਗਾ ਹੈ, ਤੁਸੀਂ ਮੇਰੀ ਮਦਦ ਕਰੋ, ਮੈਨੂੰ 2/3 ਲੱਖ ਰੁਪਏ ਦੇ ਦਿਓ।
ਉਸ ਕੋਲ ਆਸ਼ਰਮ ਬਾਰੇ ਕੋਈ ਸਬੂਤ ਨਾ ਹੋਣ ਕਰ ਕੇ ਮੁੱਦਈ ਨੇ ਡੈਂਟਲ ਕਾਲਜ ਕੋਲ ਹੀ ਕਾਰ ’ਚੋ ਉਸ ਨੂੰ ਉਤਾਰ ਦਿੱਤਾ। ਫਿਰ ਇਨ੍ਹਾਂ ਵੱਲੋਂ ਮੁੱਦਈ ਖਿਲਾਫ ਲੜਕੀ ਨੂੰ ਕਾਰ ’ਚ ਬਿਠਾਉਣ ਕਰ ਕੇ ਰਿਸ਼ਤਾ ਟੁੱਟਣ ਕਾਰਨ ਕਾਰਵਾਈ ਕਰਵਾਉਣ ਦੀ ਧਮਕੀ ਦਿੱਤੀ ਗਈ ਅਤੇ ਰਾਜ਼ੀਨਾਮੇ ਲਈ 15 ਲੱਖ ਦੀ ਡਿਮਾਂਡ ਕੀਤੀ। ਫਿਰ 8 ਲੱਖ ਰੁਪਏ ’ਚ ਫੈਸਲਾ ਤੈਅ ਹੋ ਗਿਆ। 14 ਨਵੰਬਰ ਨੂੰ ਇਕ ਹੋਟਲ ’ਚ ਪੇਮੈਂਟ ਦੇਣਾ ਤੈਅ ਹੋਇਆ।
ਮੁਲਜ਼ਮਾਂ ਨੇ ਮੁੱਦਈ ਦੇ ਪਰਿਵਾਰ ਦਾ ਨੁਕਸਾਨ ਕਰਨ ਅਤੇ ਉਸ ਦੀ ਵੀਡੀਓ ਵਾਇਰਲ ਕਰਨ ਅਤੇ ਝੂਠਾ ਮੁਕੱਦਮਾ ਦਰਜ ਕਰਵਾਉਣ ਦਾ ਡਰਾਵਾ ਦੇ ਕੇ ਉਸ ਕੋਲੋਂ 8 ਲੱਖ ਰੁਪਏ ਵਸੂਲ ਲਏ, ਜਿਸ ’ਤੇ ਥਾਣਾ ਸਦਰ ਫਰੀਦਕੋਟ ’ਚ ਮੁਕੱਦਮਾ ਦਰਜ ਕੀਤਾ ਗਿਆ।
ਫਰੀਦਕੋਟ ਪੁਲਸ ਨੇ ਤੁਰੰਤ ਕਾਰਵਾਈ ਕਰਦੇ ਹੋਏ ਗਿਰੋਹ ’ਚ ਸ਼ਾਮਲ 3 ਔਰਤਾਂ ਸਮੇਤ ਕੁੱਲ 6 ਮੁਲਜ਼ਮਾਂ ਨੂੰ ਪੈਲੀਕਨ ਪਲਾਜ਼ਾ ਨੇੜਿਓਂ ਗ੍ਰਿਫਤਾਰ ਕਰ ਲਿਆ, ਜਿਨ੍ਹਾਂ ਪਾਸੋਂ ਮੌਕੇ ’ਤੇ 8 ਲੱਖ ਰੁਪਏ ਵੀ ਬਰਾਮਦ ਕੀਤੇ ਗਏ।
Read More : ਅੰਮ੍ਰਿਤਸਰ ਦਿਹਾਤੀ ਦਾ ਐੱਸ. ਐੱਸ. ਪੀ. ਸਸਪੈਂਡ