16,706 ਕਰੋੜ ਵਿੱਚ ਹੋਇਆ ਸੌਦਾ; ਆਦਿਤਿਆ ਬਿਰਲਾ ਗਰੁੱਪ ਦੀ ਅਗਵਾਈ ਵਾਲੇ ਕੰਸੋਰਟੀਅਮ ਨੇ ਖਰੀਦੀ 100% ਹਿੱਸੇਦਾਰੀ
ਆਰਿਆਮਨ ਵਿਕਰਮ ਬਿਰਲਾ ਹੋਣਗੇ ਨਵੇਂ ਚੇਅਰਮੈਨ
ਸਪੋਰਟਸ, 26 ਮਾਰਚ : ਆਈਪੀਐਲ 2026 ਤੋਂ ਪਹਿਲਾਂ ਕ੍ਰਿਕਟ ਜਗਤ ਵਿੱਚ ਇੱਕ ਵੱਡਾ ਧਮਾਕਾ ਹੋਇਆ ਹੈ। ਰਾਇਲ ਚੈਲੇਂਜਰਜ਼ ਬੰਗਲੁਰੂ (RCB) ਹੁਣ ਟੀ-20 ਕ੍ਰਿਕਟ ਦੇ ਇਤਿਹਾਸ ਦੀ ਸਭ ਤੋਂ ਮਹਿੰਗੀ ਫਰੈਂਚਾਇਜ਼ੀ ਬਣ ਗਈ ਹੈ। ਰਿਪੋਰਟਾਂ ਅਨੁਸਾਰ, ਆਦਿਤਿਆ ਬਿਰਲਾ ਗਰੁੱਪ ਦੀ ਅਗਵਾਈ ਵਾਲੇ ਇੱਕ ਸ਼ਕਤੀਸ਼ਾਲੀ ਕੰਸੋਰਟੀਅਮ ਨੇ ਯੂਨਾਈਟਿਡ ਸਪਿਰਿਟਸ ਲਿਮਟਿਡ (USL) ਤੋਂ ਆਰਸੀਬੀ ਦੀ 100% ਹਿੱਸੇਦਾਰੀ ਲਗਭਗ ₹16,706 ਕਰੋੜ ($1.78 ਬਿਲੀਅਨ) ਵਿੱਚ ਹਾਸਲ ਕਰ ਲਈ ਹੈ।
ਇਸ ਵੱਡੇ ਸੌਦੇ ਵਿੱਚ ਆਦਿਤਿਆ ਬਿਰਲਾ ਗਰੁੱਪ ਦੇ ਨਾਲ ਟਾਈਮਜ਼ ਆਫ਼ ਇੰਡੀਆ ਗਰੁੱਪ, ਬੋਲਟ ਵੈਂਚਰਸ ਅਤੇ ਬਲੈਕਸਟੋਨ ਦੀ ਪ੍ਰਾਈਵੇਟ ਇਕੁਇਟੀ ਯੂਨਿਟ ਵੀ ਸ਼ਾਮਲ ਹਨ। ਖ਼ਾਸ ਗੱਲ ਇਹ ਹੈ ਕਿ ਇਸ ਖਰੀਦ ਵਿੱਚ ਆਰਸੀਬੀ ਦੀਆਂ ਪੁਰਸ਼ ਅਤੇ ਮਹਿਲਾ (WPL ਚੈਂਪੀਅਨ) ਦੋਵੇਂ ਟੀਮਾਂ ਸ਼ਾਮਲ ਹਨ। ਇਸ ਇਤਿਹਾਸਕ ਅੰਕੜੇ ਨੇ ਰਾਜਸਥਾਨ ਰਾਇਲਜ਼ ਦੇ ₹15,300 ਕਰੋੜ ਦੇ ਹਾਲੀਆ ਰਿਕਾਰਡ ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ।
ਸੌਦੇ ਦੇ ਮੁਤਾਬਕ ਆਰਿਆਮਨ ਵਿਕਰਮ ਬਿਰਲਾ ਨੂੰ ਫਰੈਂਚਾਇਜ਼ੀ ਦਾ ਚੇਅਰਮੈਨ ਨਿਯੁਕਤ ਕੀਤਾ ਜਾਵੇਗਾ, ਜਦਕਿ ਟਾਈਮਜ਼ ਇੰਟਰਨੈੱਟ ਦੇ ਚੇਅਰਮੈਨ ਸਤਿਆਨ ਗਜਵਾਨੀ ਉਪ-ਚੇਅਰਮੈਨ ਵਜੋਂ ਜ਼ਿੰਮੇਵਾਰੀ ਸੰਭਾਲਣਗੇ। ਇਸ ਨਿਵੇਸ਼ਕ ਸਮੂਹ ਵਿੱਚ ਡੇਵਿਡ ਬਲਿਟਜ਼ਰ ਅਤੇ ਵਾਇਰਲ ਪਟੇਲ ਵੀ ਅਹਿਮ ਹਿੱਸਾ ਹਨ।
ਕੁਮਾਰ ਮੰਗਲਮ ਬਿਰਲਾ ਨੇ ਇਸ ਮੌਕੇ ਖੁਸ਼ੀ ਜ਼ਾਹਿਰ ਕਰਦਿਆਂ ਕਿਹਾ ਕਿ ਆਈਪੀਐਲ ਇੱਕ ਗਲੋਬਲ ਸਪੋਰਟਸ ਪਾਵਰਹਾਊਸ ਬਣ ਚੁੱਕਾ ਹੈ ਅਤੇ ਆਰਸੀਬੀ ਵਰਗੀ ਦਿੱਗਜ ਫਰੈਂਚਾਇਜ਼ੀ ਨਾਲ ਜੁੜਨਾ ਗਲੋਬਲ ਖੇਡਾਂ ਵਿੱਚ ਆਪਣੀ ਮੌਜੂਦਗੀ ਮਜ਼ਬੂਤ ਕਰਨ ਦਾ ਸੁਨਹਿਰੀ ਮੌਕਾ ਹੈ। ਉਨ੍ਹਾਂ ਭਰੋਸਾ ਦਿੱਤਾ ਕਿ ਉਹ ਇਸ ਵਿਰਾਸਤ ਨੂੰ ਨਵੀਆਂ ਉਚਾਈਆਂ ‘ਤੇ ਲੈ ਕੇ ਜਾਣਗੇ।
ਦੱਸਣਯੋਗ ਹੈ ਕਿ ਇਸ ਸੌਦੇ ਨੂੰ ਅੰਤਿਮ ਰੂਪ ਦੇਣ ਲਈ ਅਜੇ ਬੀਸੀਸੀਆਈ (BCCI) ਅਤੇ ਸੀਸੀਆਈ (CCI) ਦੀ ਰਸਮੀ ਪ੍ਰਵਾਨਗੀ ਦੀ ਲੋੜ ਹੈ। ਜੇਕਰ ਸਭ ਕੁਝ ਸਹੀ ਰਿਹਾ ਤਾਂ ਆਰਸੀਬੀ ਆਈਪੀਐਲ 2026 ਵਿੱਚ ਨਵੇਂ ਮਾਲਕਾਂ ਅਤੇ ਨਵੀਂ ਉਰਜਾ ਨਾਲ ਮੈਦਾਨ ਵਿੱਚ ਉਤਰੇਗੀ।
Read More : ਦੋ ਵਾਰ ਵੀਜ਼ਾ ਰਿਜੈਕਟ ਹੋਣ ’ਤੇ 19 ਸਾਲਾ ਨੌਜਵਾਨ ਨੇ ਕੀਤੀ ਖ਼ੁਦਕੁਸ਼ੀ