“ਸਿਰਫ਼ ਚੈੱਕ-ਇਨ ਤੋਂ ਪਹਿਲਾਂ ਨਹੀਂ, ਸੁਰੱਖਿਆ ਜਾਂਚ ਤੋਂ ਬਾਅਦ ‘ਡਿਪਾਰਚਰ ਏਰੀਆ’ ਵਿਚ ਮਿਲੇ ਸਸਤਾ ਖਾਣਾ”
‘ਉਡਾਨ ਕੈਫੇ’ ਦਾ ਦਾਇਰਾ ਵਧਾਉਣ ਦੀ ਕੀਤੀ ਮੰਗ
ਨਵੀਂ ਦਿੱਲੀ, ਮਾਰਚ 10 : ਰਾਜ ਸਭਾ ਮੈਂਬਰ ਰਾਘਵ ਚੱਢਾ ਨੇ ਅੱਜ ਸੰਸਦ ਵਿੱਚ ਹਵਾਈ ਅੱਡਿਆਂ ‘ਤੇ ਖਾਣ-ਪੀਣ ਦੀਆਂ ਵਸਤੂਆਂ ਦੀਆਂ ਅਸਮਾਨੀ ਚੜ੍ਹਦੀਆਂ ਕੀਮਤਾਂ ਦਾ ਮੁੱਦਾ ਬੜੀ ਗੰਭੀਰਤਾ ਨਾਲ ਉਠਾਇਆ। ਉਨ੍ਹਾਂ ਨੇ ਸਰਕਾਰ ਨੂੰ ਅਪੀਲ ਕੀਤੀ ਕਿ ‘UDAN ਯਾਤਰੀ ਕੈਫੇ’ ਦੀ ਸਹੂਲਤ ਦੇਸ਼ ਦੇ ਸਾਰੇ ਏਅਰਪੋਰਟਾਂ ‘ਤੇ ਮੁਹੱਈਆ ਕਰਵਾਈ ਜਾਵੇ, ਤਾਂ ਜੋ ਆਮ ਯਾਤਰੀਆਂ ਨੂੰ ਲੁੱਟ ਤੋਂ ਬਚਾਇਆ ਜਾ ਸਕੇ।
ਮਹਿੰਗੇ ਖਾਣੇ ਕਾਰਨ ਯਾਤਰੀ ਪ੍ਰੇਸ਼ਾਨ
ਹਵਾਈ ਯਾਤਰੀਆਂ ਦੀ ਲੰਬੇ ਸਮੇਂ ਤੋਂ ਚੱਲੀ ਆ ਰਹੀ ਸ਼ਿਕਾਇਤ ਦਾ ਜ਼ਿਕਰ ਕਰਦਿਆਂ ਚੱਢਾ ਨੇ ਕਿਹਾ ਕਿ ਏਅਰਪੋਰਟਾਂ ‘ਤੇ ਸਧਾਰਣ ਨਾਸ਼ਤਾ ਜਾਂ ਚਾਹ-ਪਾਣੀ ਵੀ ਬਹੁਤ ਮਹਿੰਗਾ ਮਿਲਦਾ ਹੈ। ਇਸ ਕਾਰਨ ਆਮ ਨਾਗਰਿਕ ਲਈ ਆਪਣੀ ਯਾਤਰਾ ਦੌਰਾਨ ਕੁਝ ਵੀ ਖਰੀਦਣਾ ਮੁਸ਼ਕਲ ਹੋ ਜਾਂਦਾ ਹੈ। ਉਨ੍ਹਾਂ ਨੇ ਸਰਕਾਰ ਦੀ ₹10 ਦੀ ਚਾਹ ਅਤੇ ₹20 ਦੇ ਸਮੋਸੇ ਵਾਲੀ ‘UDAN ਕੈਫੇ’ ਪਹਿਲ ਦਾ ਸਵਾਗਤ ਤਾਂ ਕੀਤਾ, ਪਰ ਇਸ ਦੀ ਸੀਮਿਤ ਪਹੁੰਚ ‘ਤੇ ਸਵਾਲ ਵੀ ਚੁੱਕੇ।
ਸਿਰਫ਼ 10-12 ਏਅਰਪੋਰਟਾਂ ਤੱਕ ਸੀਮਿਤ ਹੈ ਯੋਜਨਾ
ਚੱਢਾ ਨੇ ਦੱਸਿਆ ਕਿ ਭਾਰਤ ਵਿੱਚ 150 ਤੋਂ ਵੱਧ ਕਾਰਜਸ਼ੀਲ ਏਅਰਪੋਰਟ ਹਨ, ਪਰ ਇਹ ਸਸਤੇ ਕੈਫੇ ਸਿਰਫ਼ 10-12 ਥਾਵਾਂ ‘ਤੇ ਹੀ ਚੱਲ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਮੌਜੂਦਾ ਕੈਫੇ ਵੀ ਅਕਸਰ ਸਿਕਿਊਰਿਟੀ ਚੈੱਕ ਤੋਂ ਪਹਿਲਾਂ ਬਾਹਰਲੇ ਹਿੱਸੇ ਵਿੱਚ ਬਣਾਏ ਗਏ ਹਨ, ਜਿਸ ਦਾ ਯਾਤਰੀਆਂ ਨੂੰ ਕੋਈ ਖਾਸ ਫਾਇਦਾ ਨਹੀਂ ਹੁੰਦਾ ਕਿਉਂਕਿ ਯਾਤਰੀ ਏਅਰਪੋਰਟ ਦੇ ਅੰਦਰ ਦਾਖ਼ਲ ਹੋਣ ਤੋਂ ਪਹਿਲਾਂ ਬਾਹਰੋਂ ਵੀ ਸਸਤਾ ਖਾਣਾ ਖਾ ਸਕਦੇ ਹਨ।
ਡਿਪਾਰਚਰ ਹੋਲਡ ਏਰੀਆ ‘ਤੇ ਦਿੱਤਾ ਜ਼ੋਰ
ਸਾਂਸਦ ਨੇ ਜ਼ੋਰ ਦੇ ਕੇ ਕਿਹਾ ਕਿ ਕਿਫ਼ਾਇਤੀ ਖਾਣੇ ਦੀ ਅਸਲੀ ਲੋੜ ‘ਡਿਪਾਰਚਰ ਹੋਲਡ ਏਰੀਆ’ (ਸੁਰੱਖਿਆ ਜਾਂਚ ਤੋਂ ਬਾਅਦ) ਵਿੱਚ ਹੁੰਦੀ ਹੈ, ਜਿੱਥੇ ਯਾਤਰੀਆਂ ਨੂੰ ਫਲਾਈਟ ਲਈ ਲੰਬਾ ਇੰਤਜ਼ਾਰ ਕਰਨਾ ਪੈਂਦਾ ਹੈ। ਉਨ੍ਹਾਂ ਨੇ ਇਹ ਵੀ ਸ਼ਿਕਾਇਤ ਕੀਤੀ ਕਿ ਜਿੱਥੇ ਇਹ ਕੈਫੇ ਮੌਜੂਦ ਹਨ, ਉੱਥੇ ਕਾਊਂਟਰ ਘੱਟ ਹੋਣ ਕਾਰਨ ਲੰਬੀਆਂ ਕਤਾਰਾਂ ਲੱਗ ਜਾਂਦੀਆਂ ਹਨ ਅਤੇ ਮੇਨੂ ਵੀ ਬਹੁਤ ਸੀਮਿਤ ਹੈ।
ਸਰਕਾਰ ਨੂੰ ਅਪੀਲ
ਰਾਘਵ ਚੱਢਾ ਨੇ ਮੰਗ ਕੀਤੀ ਕਿ ਹਵਾਈ ਯਾਤਰਾ ਨੂੰ ਸੱਚਮੁੱਚ ਕਿਫ਼ਾਇਤੀ ਬਣਾਉਣ ਲਈ ਇਹ ਕੈਫੇ ਦੇਸ਼ ਦੇ ਹਰ ਕੋਨੇ ਵਿੱਚ ਖੋਲ੍ਹੇ ਜਾਣ ਅਤੇ ਇਨ੍ਹਾਂ ਦਾ ਵਿਸਥਾਰ ਬੋਰਡਿੰਗ ਜ਼ੋਨ ਤੱਕ ਕੀਤਾ ਜਾਵੇ, ਤਾਂ ਜੋ ਹਰ ਆਮ ਨਾਗਰਿਕ ਸਨਮਾਨ ਨਾਲ ਸਸਤਾ ਖਾਣਾ ਪ੍ਰਾਪਤ ਕਰ ਸਕੇ।
Read More : ਪੰਜਾਬ ਦੇ 19 ਜ਼ਿਲ੍ਹੇ ‘ਡਾਰਕ ਜ਼ੋਨ’ ਵਿਚ, 62% ਪਾਣੀ ‘ਚ ਯੂਰੇਨੀਅਮ ਹੋਣ ਕਾਰਨ ਕੈਂਸਰ ਦਾ ਖ਼ਤਰਾ : ਸਤਨਾਮ ਸੰਧੂ