5 ਸਾਲ ਪਹਿਲਾਂ 11 ਔਰਤਾਂ ਵੱਲੋਂ ਬਣਾਇਆ ਸਵੈ ਸਹਾਇਤਾ ਸਮੂਹ ਅੱਜ ਰੋਜ਼ਗਾਰ ਦਾ ਮੁੱਖ ਸਾਧਨ ਬਣਿਆ
– ਪੰਜਾਬ ਸਖ਼ੀ ਸ਼ਕਤੀ ਮੇਲਾ ਘਰੇਲੂ ਦਸਤਕਾਰਾਂ/ਹਸਤਕਾਰਾਂ ਨੂੰ ਮੰਚ ਮੁਹਈਆ ਕਰਵਾਉਣ ਦਾ ਉਪਰਾਲਾ – ਵਧੀਕ ਡਿਪਟੀ ਕਮਿਸ਼ਨਰ
ਸੰਗਰੂਰ, 28 ਨਵੰਬਰ : ਸੰਗਰੂਰ ਦੇ ਰਣਬੀਰ ਕਾਲਜ ਵਿਖੇ ਚੱਲ ਰਿਹਾ 5 ਰੋਜ਼ਾ ” ਪੰਜਾਬ ਸਖ਼ੀ ਸ਼ਕਤੀ ਮੇਲਾ – 2025 ” ਜਿੱਥੇ ਦਰਸ਼ਕਾਂ ਅਤੇ ਖਰੀਦਦਾਰਾਂ ਲਈ ਖਿੱਚ ਦਾ ਕੇਂਦਰ ਬਣਿਆ ਹੋਇਆ ਹੈ ਉਥੇ ਹੀ ਘਰੇਲੂ ਦਸਤਕਾਰਾਂ/ਹਸਤਕਾਰਾਂ ਨੂੰ ਉਤਸ਼ਾਹਿਤ ਕਰਨ ਦਾ ਜ਼ਰੀਆ ਵੀ ਬਣਿਆ ਹੋਇਆ ਹੈ। ਮੇਲੇ ਵਿੱਚ ਦੁਕਾਨਾਂ ਲਗਾ ਕੇ ਬੈਠੇ ਘਰੇਲੂ ਦਸਤਕਾਰਾਂ/ਹਸਤਕਾਰਾਂ ਦੀ ਕਹਾਣੀ ਹਿੰਮਤ ਅਤੇ ਹੌਂਸਲੇ ਦੀ ਗਵਾਹੀ ਭਰਦੀ ਹੈ। ਇਸ ਮੇਲੇ ਵਿੱਚ ਦੁਕਾਨ ਲਗਾ ਕੇ ਆਪਣਾ ਕਾਰੋਬਾਰ ਕਰ ਰਹੀ ਮਮਤਾ ਰਾਣੀ ਘਰੇਲੂ ਔਰਤਾਂ ਲਈ ਪ੍ਰੇਰਨਾ ਦਾ ਸੋਮਾ ਬਣ ਕੇ ਉਭਰ ਰਹੀ ਹੈ।
ਮਮਤਾ ਰਾਣੀ (ਉਮਰ 45 ਸਾਲ) ਨੇ ਗੱਲਬਾਤ ਕਰਦਿਆਂ ਦੱਸਿਆ ਕਿ ਉਹ 10 ਹੋਰ ਔਰਤਾਂ ਨਾਲ ਰਲ਼ ਕੇ ਪਿੰਡ ਕਣਕਵਾਲ ਭੰਗੂਆਂ ਵਿਖੇ ਬਾਬਾ ਕਪੂਰ ਦਾਸ ਸੈਲਫ ਹੈਲਪ ਗਰੁੱਪ ਚਲਾ ਰਹੀ ਹੈ। ਉਹਨਾਂ ਦਾ ਗਰੁੱਪ 5 ਸਾਲ ਪਹਿਲਾਂ ਹੋਂਦ ਵਿੱਚ ਆਇਆ ਸੀ, ਜੋ ਕਿ ਅੱਜ ਕਾਰੋਬਾਰ ਪੱਖੋਂ ਆਪਣੇ ਕਾਫ਼ੀ ਪੈਰ ਪਸਾਰ ਚੁੱਕਾ ਹੈ।
ਉਹਨਾਂ ਨੇ ਸਭ ਤੋਂ ਪਹਿਲਾਂ ਕੱਪੜੇ ਧੋਣ ਵਾਲੇ ਸਰਫ਼ ਤੋਂ ਕੰਮ ਤੋਂ ਕੰਮ ਸ਼ੁਰੂ ਕੀਤਾ ਸੀ। ਉਸਤੋਂ ਬਾਅਦ ਫਿਨਾਇਲ ਅਤੇ ਡਿਸ਼ ਵਾਸ਼ ਤਿਆਰ ਕਰਨਾ ਸ਼ੁਰੂ ਕਰ ਦਿੱਤਾ। ਅੱਜ ਉਹਨਾਂ ਦਾ ਗਰੁੱਪ ਸ਼ਹਿਦ, ਹਲਦੀ, ਚਾਹ ਮਸਾਲਾ, ਗਰਮ ਮਸਾਲਾ, ਸਾਬਣ, ਕੱਪੜੇ ਧੋਣ ਵਾਲਾ ਸਰਫ, ਟਾਇਲਟ ਕਲੀਨਰ, ਭਾਂਡੇ ਧੋਣ ਵਾਲਾ ਸਰਫ਼, ਫ਼ਰਸ਼ ਸਾਫ਼ ਕਰਨ ਵਾਲਾ ਸਰਫ਼ ਆਦਿ ਉਤਪਾਦ ਖੁਦ ਤਿਆਰ ਕਰਕੇ ਬਾਜ਼ਾਰ ਵਿੱਚ ਵੇਚ ਰਿਹਾ ਹੈ।
ਉਸਨੇ ਦੱਸਿਆ ਕਿ ਉਹਨਾਂ ਨੇ 5 ਸਾਲ ਪਹਿਲਾਂ ਮਹਿਜ਼ 20 ਹਜ਼ਾਰ ਰੁਪਏ ਨਾਲ ਆਪਣੇ ਕੰਮ ਦੀ ਸ਼ੁਰੂਆਤ ਕੀਤੀ ਸੀ ਪਰ ਅੱਜ ਉਹਨਾਂ ਦੇ ਗਰੁੱਪ ਦਾ 2 ਲੱਖ ਰੁਪਏ ਤੋਂ ਵੱਧ ਦਾ ਕਾਰੋਬਾਰ ਹੈ। ਉਸਨੇ ਦੱਸਿਆ ਕਿ ਉਹਨਾਂ ਦੇ ਇਸ ਸਫ਼ਰ ਵਿੱਚ ਕ੍ਰਿਸ਼ੀ ਵਿਗਿਆਨ ਕੇਂਦਰ ਖੇੜੀ (ਜ਼ਿਲ੍ਹਾ ਸੰਗਰੂਰ) ਅਤੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਦਾ ਬਹੁਤ ਯੋਗਦਾਨ ਹੈ।
ਜ਼ਿਲ੍ਹਾ ਪ੍ਰਸ਼ਾਸ਼ਨ ਸੰਗਰੂਰ ਵੱਲੋਂ ਪਹਿਲ ਸੰਸਥਾ ਅਧੀਨ ਉਹਨਾਂ ਨੂੰ ਹਰੇਕ ਹਫਤੇ ਸਥਾਨਕ ਬੀ ਐੱਸ ਐਨ ਐਲ ਪਾਰਕ ਵਿੱਚ ਬਾਜ਼ਾਰ ਲਗਾਉਣ ਦੀ ਖੁੱਲ੍ਹ ਦਿੱਤੀ ਗਈ ਹੈ, ਜਿਸ ਨਾਲ ਉਹਨਾਂ ਨੂੰ ਆਪਣੇ ਉਤਪਾਦਾਂ ਨੂੰ ਵੇਚਣ ਵਿੱਚ ਸਹਾਇਤਾ ਮਿਲਦੀ ਹੈ। ਉਸਨੇ ਕਿਹਾ ਕਿ ਉਹ ਆਪਣੇ ਉਤਪਾਦਾਂ ਨੂੰ ਜਲਦੀ ਹੀ ਆਨਲਾਈਨ ਵੀ ਵੇਚਣਾ ਸ਼ੁਰੂ ਕਰਨਗੇ।
ਉਸਨੇ ਕਿਹਾ ਕਿ ਔਰਤਾਂ ਨੂੰ ਚਾਹੀਦਾ ਹੈ ਕਿ ਕ੍ਰਿਸ਼ੀ ਵਿਗਿਆਨ ਕੇਂਦਰ ਖੇੜੀ ਅਤੇ ਵਧੀਕ ਡਿਪਟੀ ਕਮਿਸ਼ਨਰ (ਪੇਂਡੂ ਵਿਕਾਸ) ਦਫ਼ਤਰ ਸੰਗਰੂਰ ਨਾਲ ਰਾਬਤਾ ਕਰਕੇ ਆਪਣਾ ਸਫ਼ਰ ਸ਼ੁਰੂ ਕਰ ਸਕਦੀਆਂ ਹਨ।
ਵਧੀਕ ਡਿਪਟੀ ਕਮਿਸ਼ਨਰ ਸੁਖਚੈਨ ਸਿੰਘ ਪਪੜਾ ਨੇ ਕਿਹਾ ਕਿ ਰਣਬੀਰ ਕਾਲਜ ਵਿਖੇ ਚੱਲ ਰਿਹਾ ਪੰਜਾਬ ਸਖ਼ੀ ਸ਼ਕਤੀ ਮੇਲਾ ਮਮਤਾ ਰਾਣੀ ਵਰਗੇ ਘਰੇਲੂ ਦਸਤਕਾਰਾਂ/ਹਸਤਕਾਰਾਂ ਨੂੰ ਉਹਨਾਂ ਦੀ ਕਲਾ ਨੂੰ ਲੋਕਾਂ ਤੱਕ ਪਹੁੰਚਾਉਣ ਅਤੇ ਉਤਪਾਦ ਵੇਚਣ ਲਈ ਮੰਚ ਮੁਹਈਆ ਕਰਵਾਉਣ ਦਾ ਉਪਰਾਲਾ ਹੈ।
Read More : ਨਸ਼ੇ ਦੀ ਓਵਰਡੋਜ਼ ਨਾਲ ਨੌਜਵਾਨ ਦੀ ਮੌਤ