ਵਿਦੇਸ਼ ’ਚ ਬੈਠੇ ਗੈਂਗਸਟਰ ਰਾਜੂ ਔਲਖ ਅਤੇ ਸੋਨੂੰ ਖੱਤਰੀ ਨੇ ਦਿੱਤੀ ਸੀ ਧਰਮਿੰਦਰ ਨੂੰ ਮਾਰਨ ਦੀ ਫਿਰੌਤੀ
ਨਵਾਂਸ਼ਹਿਰ, 11 ਨਵੰਬਰ : ਥਾਣਾ ਬਹਿਰਾਮ ਅਧੀਨ ਪੈਂਦੇ ਪਿੰਡ ਮੰਢਾਲੀ ’ਚ ਇਕ ਵਿਅਕਤੀ ’ਤੇ ਮਾਰਨ ਦੇ ਇਰਾਦੇ ਨਾਲ ਗੋਲੀਬਾਰੀ ਕਰਨ ਵਾਲੇ 4 ਮਾਰੂਤੀ ਕਾਰ ਸਵਾਰਾਂ ’ਚੋਂ ਬਾਕੀ ਰਹਿੰਦੇ 2 ਮੁਲਜ਼ਮਾਂ ਨੂੰ ਵੀ ਪੁਲਸ ਨੇ ਮੁਕਾਬਲੇ ਤੋਂ ਬਾਅਦ ਗ੍ਰਿਫਤਾਰ ਕਰ ਲਿਆ ਹੈ।
ਐੱਸ. ਐੱਸ. ਪੀ. ਡਾ. ਮਹਿਤਾਬ ਸਿੰਘ ਨੇ ਦੱਸਿਆ ਕਿ 29 ਅਕਤੂਬਰ ਨੂੰ ਥਾਣਾ ਬਹਿਰਾਮ ਅਧੀਨ ਪੈਂਦੇ ਪਿੰਡ ਮੰਢਾਲੀ ਨਿਵਾਸੀ ਧਰਮਿੰਦਰ ਪੁੱਤਰ ਗੁਰਨਾਮ ਸਿੰਘ ’ਤੇ ਮਾਰੂਤੀ ਕਾਰ ਸਵਾਰ 4 ਵਿਅਕਤੀਆਂ ਨੇ ਮਾਰਨ ਦੇ ਇਰਾਦੇ ਨਾਲ ਗੋਲੀਬਾਰੀ ਕੀਤੀ ਸੀ, ਜਿਸ ’ਚ ਧਰਮਿੰਦਰ ਵਾਲ-ਵਾਲ ਬਚ ਗਿਆ ਸੀ।
ਉਨ੍ਹਾਂ ਦੱਸਿਆ ਕਿ ਜ਼ਿਲਾ ਪੁਲਸ ਵੱਲੋਂ ਐੱਸ. ਪੀ. ਇਨਵੈਸਟੀਗੇਸ਼ਨ ਸਰਬਜੀਤ ਸਿੰਘ ਵਾਹੀਆ, ਡੀ. ਐੱਸ. ਪੀ. ਬੰਗਾ ਹਰਜੀਤ ਸਿੰਘ, ਸੀ. ਆਈ. ਏ. ਇੰਚਾਰਜ ਅਤੇ ਐੱਸ. ਐੱਚ. ਓ. ਬਹਿਰਾਮ ਦੀ ਅਗਵਾਈ ਹੇਠ ਬਣਾਈ ਇਕ ਟੀਮ ਨੇ ਵਿਗਿਆਨਕ ਜਾਂਚ ਕਰਨ ਤੋਂ ਬਾਅਦ ਮਾਮਲੇ ਦੇ 4 ਮੁਲਜ਼ਮਾਂ ਦੀ ਪਛਾਣ ਕੀਤੀ, ਜਿਨ੍ਹਾਂ ’ਚ ਸੰਦੀਪ ਵਾਸੀ ਬਹਿਰਾਮ, ਅਭੈ ਵਾਸੀ ਜਲੰਧਰ, ਅਸ਼ਵਿੰਦਰ ਈਸ਼ੂ ਅਤੇ ਅਮਨ ਸੰਦੀਪ ਨੂੰ ਗ੍ਰਿਫਤਾਰ ਕਰ ਲਿਆ ਸੀ। ਪੁਲਸ ਸੂਤਰਾਂ ਅਨੁਸਾਰ ਬਹਿਰਾਮ ਥਾਣੇ ਅਧੀਨ ਪੈਂਦੇ ਪਿੰਡ ਮੰਢਾਲੀ ਦੇ ਵਸਨੀਕ ਧਰਮਿੰਦਰ ਪੁੱਤਰ ਗੁਰਨਾਮ ਸਿੰਘ ਨੂੰ ਮਾਰਨ ਦੀ ਫਿਰੌਤੀ ਕੈਨੇਡਾ ’ਚ ਬੈਠੇ ਧਰਮਿੰਦਰ ਪੁੱਤਰ ਅਜੀਤ ਸਿੰਘ ਮੂਲ ਵਾਸੀ ਪਿੰਡ ਮੰਢਾਲੀ ਅਤੇ ਉਸ ਦੇ ਚਾਚਾ ਦਾਰਾ ਸਿੰਘ ਇੰਗਲੈਂਡ ਨੇ ਦਿੱਤੀ ਸੀ।
ਪੁਲਸ ਸੂਤਰਾਂ ਅਨੁਸਾਰ ਰਾਜੂ ਔਲਖ ਨੂੰ ਅਮਰੀਕਾ ਬੁਲਾਉਣ ਵਾਲੇ ਗੈਂਗਸਟਰ ਸੋਨੂੰ ਖੱਤਰੀ ਨੇ ਧਰਮਿੰਦਰ ਪੁੱਤਰ ਅਜੀਤ ਸਿੰਘ ਨਾਲ ਸੌਦਾ ਕੀਤਾ ਸੀ, ਜਿਸ ਨੇ ਗ੍ਰਿਫਤਾਰ ਮੁਲਜ਼ਮ ਸੰਦੀਪ, ਅਭੈ, ਅਸ਼ਵਿੰਦਰ ਅਤੇ ਅਮਨ ਅਤੇ ਹਰਮਨ ਨੇ ਧਰਮਿੰਦਰ ਪੁੱਤਰ ਗੁਰਨਾਮ ਦੇ ਘਰ ਦੀ ਰੇਕੀ ਕੀਤੀ ਸੀ। ਪੁਲਸ ਸੂਤਰਾਂ ਅਨੁਸਾਰ ਵਿਦੇਸ਼ ਬੈਠੇ ਗੈਂਗਸਟਰਾਂ ਨੇ ਧਰਮਿੰਦਰ ਪੁੱਤਰ ਗੁਰਨਾਮ ਨੂੰ ਮਾਰਨ ’ਤੇ ਦੋਵਾਂ ਮੁਲਜ਼ਮਾਂ ਨੂੰ ਅਮਰੀਕਾ ਬੁਲਾਉਣ ਅਤੇ ਬਾਕੀਆਂ ਨੂੰ ਪੈਸੇ ਦਾ ਲਾਲਚ ਦਿੱਤਾ ਗਿਆ ਸੀ।
ਐੱਸ. ਐੱਸ. ਪੀ. ਡਾ. ਮਹਿਤਾਬ ਨੇ ਦੱਸਿਆ ਕਿ ਇਸ ਮਾਮਲੇ ’ਚ ਪਹਿਲਾਂ ਹੀ ਗ੍ਰਿਫਤਾਰ ਕੀਤੇ ਸੰਦੀਪ ਅਤੇ ਅਭੈ ਤੋਂ ਪੁੱਛਗਿੱਛ ਦੌਰਾਨ ਇਹ ਖੁਲਾਸਾ ਹੋਇਆ ਕਿ ਉਨ੍ਹਾਂ ਦੇ ਗਿਰੋਹ ਦੇ ਮੁਲਜ਼ਮਾਂ ਨੇ ਬਹਿਰਾਮ ਥਾਣੇ ਅਧੀਨ ਆਉਂਦੇ ਪਿੰਡਾਂ ’ਚ ਆਪਣਾ ਟਿਕਾਣਾ ਬਣਾਇਆ ਹੋਇਆ ਹੈ। ਉਨ੍ਹਾਂ ਅੱਗੇ ਦੱਸਿਆ ਕਿ ਸੋਮਵਾਰ ਨੂੰ ਸੂਚਨਾ ਮਿਲੀ ਸੀ ਕਿ ਬਾਕੀ ਮੁਲਜ਼ਮ ਅਸ਼ਵਿੰਦਰ ਅਤੇ ਅਮਨ ਬਹਿਰਾਮ ਥਾਣੇ ਅਧੀਨ ਆਉਂਦੇ ਪਿੰਡ ਖਾਨ ਖਾਨਾ ’ਚ ਹਨ। ਇਸ ਸੂਚਨਾ ’ਤੇ ਕਾਰਵਾਈ ਕਰਦਿਆਂ ਪੁਲਸ ਨੇ ਮੁਲਜ਼ਮਾਂ ਨੂੰ ਘੇਰ ਲਿਆ। ਉਨ੍ਹਾਂ ਕਿਹਾ ਕਿ ਮੁਲਜ਼ਮਾਂ ਨੇ ਪੁਲਸ ’ਤੇ 6 ਗੋਲੀਆਂ ਚਲਾਈਆਂ, ਜਿਨ੍ਹਾਂ ’ਚੋਂ 2 ਗੋਲੀਆਂ ਐੱਸ. ਐੱਚ. ਓ. ਦੀ ਗੱਡੀ ਨੂੰ ਲੱਗੀਆਂ।
ਜਵਾਬੀ ਕਾਰਵਾਈ ’ਚ 2 ਗੋਲੀਆਂ ਅਸ਼ਵਿੰਦਰ ਦੀ ਲੱਤ ’ਚ ਲੱਗੀਆਂ ਅਤੇ ਇਕ ਗੋਲੀ ਅਮਨ ਦੀ ਲੱਤ ’ਚ ਲੱਗੀ। ਉਨ੍ਹਾਂ ਕਿਹਾ ਕਿ ਗ੍ਰਿਫਤਾਰ ਮੁਲਜ਼ਮਾਂ ਤੋਂ ਇਕ ਪਿਸਤੌਲ ਸਮੇਤ 2 ਹਥਿਆਰ ਬਰਾਮਦ ਕੀਤੇ ਗਏ ਹਨ। ਉਨ੍ਹਾਂ ਅੱਗੇ ਦੱਸਿਆ ਕਿ ਮੁਕਾਬਲੇ ’ਚ ਗ੍ਰਿਫਤਾਰ ਕੀਤੇ ਅਸ਼ਵਿੰਦਰ ਅਤੇ ਅਮਨ ਵਿਰੁੱਧ ਪਹਿਲਾਂ ਹੀ ਬਿਆਸ ਨੇੜੇ ਇਕ ਪਿੰਡ ’ਚ ਕਤਲ ਅਤੇ ਗੜ੍ਹਸ਼ੰਕਰ ’ਚ ਗੋਲੀਬਾਰੀ ਦੇ ਮਾਮਲੇ ਦਰਜ ਹਨ।
ਜ਼ਖਮੀ ਮੁਲਜ਼ਮਾਂ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ ਹੈ। ਡਾ. ਮਹਿਤਾਬ ਨੇ ਕਿਹਾ ਕਿ ਇਸ ਮਾਮਲੇ ’ਚ ਪੁਲਸ ਨੇ ਗੈਂਗਸਟਰ ਸੋਨੂੰ ਖੱਤਰੀ ਅਤੇ ਰਾਜੂ ਔਲਖ ਨੂੰ ਵੀ ਨਾਮਜ਼ਦ ਕੀਤਾ ਹੈ, ਜੋ ਇਸ ਸਮੇਂ ਵਿਦੇਸ਼ ’ਚ ਹਨ।
Read More : ਦਿੱਲੀ ਬਲਾਸਟ ਤੋਂ ਬਾਅਦ ਪੁਲਸ ਵੱਲੋਂ ਥਾਂ-ਥਾਂ ’ਤੇ ਨਾਕਾਬੰਦੀ