ਅਗਲੀ ਭਰਤੀ ਜਲਦੀ ਦੇਣ ਅਤੇ ਉਮਰ ਹੱਦ ਛੋਟ ਦੇਣ ਦਾ ਸਿਹਤ ਮੰਤਰੀ ਨੇ ਕੀਤਾ ਵਾਅਦਾ : ਆਗੂ
– 31 ਦਸੰਬਰ ਤੋਂ ਪਹਿਲਾਂ-ਪਹਿਲਾਂ ਕੀਤਾ ਜਾਵੇ ਭਰਤੀ ਇਸ਼ਤਿਹਾਰ ਜਾਰੀ
ਪਟਿਆਲਾ, 29 ਨਵੰਬਰ : ਸਿਹਤ ਮੰਤਰੀ ਡਾ. ਬਲਵੀਰ ਸਿੰਘ ਦੀ ਪਾਸੀ ਰੋਡ ਵਿਖੇ ਕੋਠੀ ਨੇੜੇ ਪਿਛਲੇ 11 ਦਿਨਾਂ ਤੋਂ ਟੈਂਕੀ ਉੱਤੇ ਬੈਠੇ ਮੱਖਣ ਸਿੰਘ ਤੋਗਾਵਾਲ ਆਖਿਰ ਅੱਜ ਦੇਰ ਸ਼ਾਮ ਸਿਹਤ ਮੰਤਰੀ ਵੱਲੋਂ ਦਿੱਤੇ ਭਰੋਸੇ ਉਪਰੰਤ ਟੈਂਕੀ ਤੋਂ ਉਤਰ ਆਏ ਹਨ ।
ਇਸ ਮੌਕੇ ਬੇਰੋਜ਼ਗਾਰ ਮਲਟੀਪਰਪਜ ਯੂਨੀਅਨ ਦੇ ਆਗੂ ਸੁਖਵਿੰਦਰ ਸਿੰਘ ਢਿੱਲਵਾ ਨੇ ਦੱਸਿਆ ਕਿ ਪਿਛਲੇ 19 ਨਵੰਬਰ ਤੋਂ ਟੈਂਕੀ ਉੱਤੇ ਬੈਠੇ ਮੱਖਣ ਸਿੰਘ ਦੀ ਮੰਗ ਸੀ ਕਿ ਸਿਹਤ ਵਿਭਾਗ ਵਿੱਚ ਜਾਰੀ ਹੋਈਆਂ 270 ਪੋਸਟਾਂ ਵਿੱਚੋਂ ਉਮਰ ਹੱਦ ਛੋਟ ਦੇ ਕੇ ਸਾਰੇ ਓਵਰ ਏਜ ਹੋ ਚੁੱਕੇ ਬੇਰੁਜ਼ਗਾਰਾਂ ਨੂੰ ਇੱਕ ਮੌਕਾ ਦਿੱਤਾ ਜਾਵੇ।
ਇਸ ਦੌਰਾਨ ਭਾਵੇਂ ਇਕ ਦੋ ਵਾਰ ਸਿਹਤ ਮੰਤਰੀ ਨਾਲ ਰਾਬਤਾ ਬਣਿਆ ਪ੍ਰੰਤੂ ਉਮਰ ਹੱਦ ਛੋਟ ਦੇਣ ਦੀ ਪ੍ਰਕਿਰਿਆ ਮੁਕੰਮਲ ਨਹੀਂ ਕੀਤੀ ਗਈ। ਆਖਿਰ ਅੱਜ ਦੇਰ ਸ਼ਾਮ ਸਥਾਨਕ ਪ੍ਰਸ਼ਾਸਨ ਨੇ ਸਿਹਤ ਮੰਤਰੀ ਡਾਕਟਰ ਬਲਵੀਰ ਸਿੰਘ ਨਾਲ ਬੇਰੋਜ਼ਗਾਰਾਂ ਦੀ ਗੱਲ ਕਰਵਾਉਂਦੇ ਹੋਏ ਇਸ ਗੱਲ ’ਤੇ ਸਹਿਮਤੀ ਬਣਾਈ ਕੇ ਧਰਨਾ ਖਤਮ ਕਰ ਦਿੱਤਾ ਜਾਵੇ ਅਤੇ ਅਗਲੀ ਭਰਤੀ ਜਲਦੀ ਜਾਰੀ ਕੀਤੀ ਜਾਵੇਗੀ, ਜਿਸ ’ਚ ਓਵਰਏਜ ਹੋ ਚੁੱਕੇ ਸਾਰੇ ਬੇਰੋਜ਼ਗਾਰਾਂ ਨੂੰ ਇਕ ਮੌਕਾ ਦਿੱਤਾ ਜਾਵੇਗਾ।
ਯੂਨੀਅਨ ਦੇ ਆਗੂ ਢਿੱਲਵਾ ਨੇ ਦੱਸਿਆ ਕਿ 31 ਦਸੰਬਰ 25 ਤੋਂ ਪਹਿਲਾਂ-ਪਹਿਲਾਂ ਅਗਲੀ ਭਰਤੀ ਦਾ ਇਸ਼ਤਿਹਾਰ ਜਾਰੀ ਕੀਤਾ ਜਾਵੇ ਤਾਂ ਜੋ ਓਵਰਏਜ਼ ਹੋਣ ਜਾ ਚੁੱਕੇ ਅਨੇਕਾਂ ਹੋਰ ਬੇਰੋਜ਼ਗਾਰਾਂ ਦੀ ਉਮਰ ਮਿਆਦ ਨਾ ਲੰਘੇ। ਇਸ ਮੌਕੇ ਮੋਰਚੇ ਦੇ ਆਗੂ ਰਮਨ ਮਲੋਟ ਨੇ ਦੱਸਿਆ ਕਿ ਬੇਰੋਜ਼ਗਾਰ ਮਲਟੀਪਰਪਜ ਯੂਨੀਅਨ ਦੇ ਇਸ ਸੰਘਰਸ਼ ਨੂੰ ਬੇਰੋਜ਼ਗਾਰ ਸਾਂਝੇ ਮੋਰਚੇ ਨੇ ਇਕਮੁੱ,ਠ ਹੋ ਕੇ ਲੜਿਆ ਹੈ। ਬੇਰੋਜ਼ਗਾਰ ਯੂਨੀਅਨ ਦੇ ਅਮਨ ਸੇਖਾ ਨੇ ਬੇਰੋਜ਼ਗਾਰਾਂ ਦੇ ਇਸ ਸੰਘਰਸ਼ ਦੀ ਪ੍ਰੋੜਤਾ ਕੀਤੀ।
ਇਸ ਮੌਕੇ ਹਰਜਿੰਦਰ ਸਿੰਘ ਝੁਨੀਰ ਸੰਦੀਪ ਮੋਫਰ, ਪ੍ਰੇਮ ਸਿੰਘ ਸ੍ਰੀ ਅੰਮ੍ਰਿਤਸਰ, ਹੀਰਾ ਲਾਲ ਤੋਂ ਇਲਾਵਾ ਕੇਵਲ ਕ੍ਰਿਸ਼ਨ ਅਬੋਹਰ, ਸੁਖਪਾਲ ਸਿੰਘ ਪਾਲੀ ਧਿੰਗੜ ਆਦਿ ਵੀ ਹਾਜ਼ਰ ਸਨ।
Read More : ਜ਼ਿਲ੍ਹਾ ਪ੍ਰੀਸ਼ਦਾਂ ਅਤੇ ਪੰਚਾਇਤ ਸੰਮਤੀਆਂ ਦੀਆਂ ਚੋਣਾਂ ਦਾ ਐਲਾਨ