ਸ਼ੇਨਾ ਅਗਰਵਾਲ ਵੱਲੋਂ 2 ਬੀ. ਡੀ. ਪੀ. ਓਜ਼ ਸਮੇਤ ਕਈ ਅਧਿਕਾਰੀਆਂ ’ਤੇ ਕਾਰਵਾਈ ਦੇ ਨਿਰਦੇਸ਼
ਸ੍ਰੀ ਮੁਕਤਸਰ ਸਾਹਿਬ, 4 ਅਗਸਤ : ਜ਼ਿਲਾ ਮੁਕਤਸਰ ਦੇ ਵੱਖ-ਵੱਖ ਪਿੰਡਾਂ ਵਿੱਚ ਸਾਲ 2016 ਤੋਂ 2021 ਤੱਕ ਹੋਏ ਮਨਰੇਗਾ ਕੰਮਾਂ ਵਿੱਚ ਕਰੋੜਾਂ ਰੁਪਏ ਦੀ ਧਾਂਦਲੀ ਸਾਹਮਣੇ ਆਈ ਹੈ। ਵਿਧਾਨ ਸਭਾ ਹਲਕਾ ਗਿੱਦੜਬਾਹਾ ਵਿੱਚ 1.93 ਕਰੋੜ 42 ਹਜ਼ਾਰ ਰੁਪਏ ਅਤੇ ਮੁਕਤਸਰ ਦੇ ਪਿੰਡ ਬਰਕੰਦੀ ਵਿੱਚ ਇੱਕ ਕਰੋੜ 57 ਹਜ਼ਾਰ ਰੁਪਏ ਦੀ ਧਾਂਦਲੀ ਪਾਈ ਗਈ ਹੈ।
ਇਸ ਤੋਂ ਇਲਾਵਾ ਹੋਰ ਪਿੰਡਾਂ ਵਿੱਚ ਵੀ ਕਰੋੜਾਂ ਰੁਪਏ ਦੀ ਧਾਂਦਲੀ ਨਜ਼ਰ ਆਈ ਹੈ। ਇਸ ਮਾਮਲੇ ਵਿੱਚ ਰਾਜ ਸਰਕਾਰ ਪੇਂਡੂ ਵਿਕਾਸ ਤੇ ਪੰਚਾਇਤ ਵਿਭਾਗ ਦੀ ਸੰਯੁਕਤ ਵਿਕਾਸ ਕਮਿਸ਼ਨਰ ਅਤੇ ਮਨਰੇਗਾ ਕਮਿਸ਼ਨਰ ਸ਼ੇਨਾ ਅਗਰਵਾਲ ਵੱਲੋਂ ਉਸ ਸਮੇਂ ਦੇ ਮੁਕਤਸਰ, ਗਿੱਦੜਬਾਹਾ ਦੇ ਬੀ.ਡੀ.ਪੀ.ਓ. ਸਮੇਤ ਹੋਰ ਅਧਿਕਾਰੀਆਂ ਤੇ ਕਰਮਚਾਰੀਆਂ ਖਿਲਾਫ਼ ਕਾਰਵਾਈ ਲਈ ਡਿਪਟੀ ਕਮਿਸ਼ਨਰ ਮੁਕਤਸਰ ਅਭਿਜੀਤ ਕਪਲਿਸ਼ ਨੂੰ ਲਿਖਿਆ ਹੈ। ਇਸ ਮਾਮਲੇ ਦੀ ਜਾਂਚ ਲਈ ਭਾਰਤ ਸਰਕਾਰ ਦੇ ਮੰਤਰਾਲੇ ਦੀ ਟੀਮ ਨੇ 26 ਅਤੇ 27 ਮਈ 2025 ਨੂੰ ਜ਼ਿਲ੍ਹਾ ਮੁਕਤਸਰ ’ਚ ਮਨਰੇਗਾ ਸਕੀਮ ਅਧੀਨ ਹੋਏ ਕੰਮਾਂ ਦੀ ਚੈਕਿੰਗ ਕੀਤੀ ਸੀ ਜਿਸ ‘ਚ 14 ਜੁਲਾਈ 2025 ਨੂੰ ਜਾਂਚ ਦੀ ਰਿਪੋਰਟ ਤਿਆਰ ਕਰਕੇ ਰਾਜ ਪੱਧਰ ’ਤੇ ਦੋ ਕਮੇਟੀਆਂ ਦਾ ਗਠਨ ਕਰਕੇ ਸੌਂਪ ਦਿੱਤੀ ਗਈ ਸੀ।
ਮਨਰੇਗਾ ਦੇ ਤਹਿਤ ਛੱਪੜਾਂ, ਗਲੀਆਂ, ਸੜਕਾਂ ਸਮੇਤ ਹੋਰ ਕੰਮ ਕੀਤੇ ਗਏ ਹਨ, ਜਿਸ ਵਿੱਚ ਧਾਂਦਲੀ ਕੀਤੀ ਗਈ ਹੈ। ਜਾਣਕਾਰੀ ਅਨੁਸਾਰ ਵਿਧਾਨ ਸਭਾ ਹਲਕਾ ਗਿੱਦੜਬਾਹਾ ਦੇ ਪਿੰਡ ਰੁਖਾਲਾ, ਛੱਤੇਆਣਾ, ਨਾਨਕਸਰ, ਕਾਉਣੀ, ਹੁਸਨਰ, ਦੋਦਾ, ਥੇਹੜੀ, ਸੋਥਾ, ਕੁਰਾਈਵਾਲਾ ਵਿੱਚ ਸਾਲ 2017-18 ਵਿੱਚ ਵਰਕ ਕੋਡ ਬਣਾਏ ਗਏ ਅਤੇ 2021 ਵਿੱਚ ਅਦਾਇਗੀ ਕੀਤੀ ਗਈ।
ਪਿੰਡਾਂ ਵਿੱਚ ਮਨਰੇਗਾ ਕੰਮਾਂ ਲਈ 152.31 ਲੱਖ ਦੀ ਰਕਮ ਬੀ.ਡੀ.ਪੀ.ਓ. ਸੁਖਵਿੰਦਰ ਕੌਰ ਜੋ ਹੁਣ ਬਲਾਕ ਅਧਿਕਾਰੀ ਮੁਕਤਸਰ, ਜਸਵਿੰਦਰ ਸਿੰਘ ਬੀ.ਡੀ.ਪੀ.ਓ. ਜੋਕਿ ਹੁਣ ਮਲੋਟ ‘ਚ ਬਲਾਕ ਅਧਿਕਾਰੀ ਨੇ 24.71 ਲੱਖ, ਜਸਵੰਤ ਰਾਏ ਬੀ.ਡੀ.ਪੀ.ਓ. ਵੱਲੋਂ 16.40 ਲੱਖ ਰੁਪਏ ਜੋ ਕਿ ਏ.ਪੀ.ਓ. ਦਲੀਪ ਕੁਮਾਰ (ਹੁਣ ਟਰਮੀਨੇਟ), ਤਕਨੀਕੀ ਸਹਾਇਕ ਮਨਦੀਪ ਸਿੰਘ, ਸਰਬਜੀਤ ਸਿੰਘ, ਗ੍ਰਾਮ ਰੋਜ਼ਗਾਰ ਸਹਾਇਕ ਸੁਖਵੀਰ ਸਿੰਘ ਅਤੇ ਇਕਬਾਲ ਸਿੰਘ ਦੀ ਕਥਿਤ ਮਿਲੀਭੁਗਤ ਨਾਲ ਇਹ ਰਕਮ ਜਾਰੀ ਕੀਤੀ ਗਈ ਹੈ, ਜਿਸਦੀ ਜਾਂਚ-ਪੜਤਾਲ ’ਤੇ ਇਹ ਲੋਕ ਰਿਕਾਰਡ ਪੇਸ਼ ਨਹੀਂ ਕਰ ਸਕੇ ਅਤੇ ਇਨ੍ਹਾਂ ਅਧਿਕਾਰੀਆਂ ਤੇ ਕਰਮਚਾਰੀਆਂ ’ਤੇ ਦੋਸ਼ ਸਾਬਤ ਹੁੰਦੇ ਹਨ। ਇਸ ਲਈ ਇਨ੍ਹਾਂ’ਤੇ ਕਾਰਵਾਈ ਲਈ ਲਿਖਿਆ ਹੈ।
ਇਸੇ ਤਰ੍ਹਾਂ ਪਿੰਡ ਬਰਕੰਦੀ ਜੋ ਕਿ ਸ਼੍ਰੋਮਣੀ ਅਕਾਲੀ ਦਲ ਦੇ ਸਾਬਕਾ ਵਿਧਾਇਕ ਕੰਵਰਜੀਤ ਸਿੰਘ ਦਾ ਪਿੰਡ ਹੈ, ’ਚ ਕਰੋੜਾਂ ਰੁਪਏ ’ਚ ਝੀਲ ਅਤੇ ਗਲੀਆਂ-ਨਾਲੀਆਂ ਦਾ ਕੰਮ ਕੀਤਾ ਜਾਣਾ ਸੀ, ਵਿੱਚ ਇੱਕ ਕਰੋੜ 57 ਹਜ਼ਾਰ ਰੁਪਏ ਦੀ ਧਾਂਦਲੀ ਸਾਹਮਣੇ ਆਈ ਹੈ। ਇਸ ਤੋਂ ਇਲਾਵਾ ਪਿੰਡ ਜੱਸੇਆਣਾ, ਰੋੜਾਂਵਾਲੀ, ਸੱਕਾਂਵਾਲੀ ਅਤੇ ਹੋਰ ਪਿੰਡਾਂ’ਚ ਵੀ ਕਰੋੜਾਂ ਦੀ ਧਾਂਦਲੀ ਸਾਹਮਣੇ ਆਈ ਹੈ।
Read More : ਚੱਲਦੀ ਕਾਰ ਨੂੰ ਲੱਗੀ ਅੱਗ