ਭਰਾ, ਮਾਤਾ-ਪਿਤਾ ਹਿਰਾਸਤ ’ਚ, ਜੈਸ਼ ਦੀ ਮਹਿਲਾ ਵਿੰਗ ਦੀ ਮੁਖੀ ਡਾ. ਸ਼ਾਹੀਨ ਫਰੀਦਾਬਾਦ ਤੋਂ ਗ੍ਰਿਫਤਾਰ
ਨਵੀਂ ਦਿੱਲੀ, 11 ਨਵੰਬਰ : ਦਿੱਲੀ ’ਚ ਸੋਮਵਾਰ ਸ਼ਾਮ ਹੋਏ ਕਾਰ ਧਮਾਕੇ ਵਿਚ ਮਰਨ ਵਾਲਿਆਂ ਦੀ ਗਿਣਤੀ ਮੰਗਲਵਾਰ ਨੂੰ ਵਧ ਕੇ 12 ਹੋ ਗਈ। ਇਨ੍ਹਾਂ ਵਿਚ 2 ਔਰਤਾਂ ਹਨ। ਹੁਣ ਤਕ 2 ਲਾਸ਼ਾਂ ਦੀ ਪਛਾਣ ਹੋ ਸਕੀ ਹੈ। ਬਾਕੀਆਂ ਦੀ ਪਛਾਣ ਡੀ. ਐੱਨ. ਏ. ਟੈਸਟ ਰਾਹੀਂ ਹੋਵੇਗੀ। 20 ਜ਼ਖਮੀਆਂ ਦਾ ਇਲਾਜ ਜਾਰੀ ਹੈ।
ਲਾਲ ਕਿਲਾ ਮੈਟਰੋ ਸਟੇਸ਼ਨ ਦੇ ਗੇਟ ਨੰ. 1 ਦੇ ਨੇੜੇ ਸੋਮਵਾਰ ਸ਼ਾਮ 6 ਵੱਜ ਕੇ 52 ਮਿੰਟ ’ਤੇ ਹੋਏ ਧਮਾਕੇ ਵਿਚ ਜਿਸ ਚਿੱਟੀ ਆਈ-20 ਕਾਰ ਦੀ ਵਰਤੋਂ ਕੀਤੀ ਗਈ ਸੀ, ਉਸ ਦੀ ਸੀ. ਸੀ. ਟੀ. ਵੀ. ਫੁਟੇਜ ਸਾਹਮਣੇ ਆਈ ਹੈ। ਮੈਟਰੋ ਸਟੇਸ਼ਨ ਦੀ ਪਾਰਕਿੰਗ ’ਚੋਂ ਨਿਕਲ ਰਹੀ ਕਾਰ ਵਿਚ ਕਾਲਾ ਮਾਸਕ ਪਹਿਨੀਂ ਇਕ ਸ਼ਖਸ ਬੈਠਾ ਨਜ਼ਰ ਆਇਆ।
ਪੁਲਸ ਮੁਤਾਬਕ ਇਸ ਸ਼ਖਸ ਦਾ ਨਾਂ ਡਾ. ਮੁਹੰਮਦ ਉਮਰ ਨਬੀ ਹੈ, ਜੋ ਪੁਲਵਾਮਾ ਦਾ ਵਾਸੀ ਹੈ। ਉਸ ਨੇ ਖੁਦ ਨੂੰ ਧਮਾਕਾਖੇਜ਼ ਸਮੱਗਰੀ ਨਾਲ ਉਡਾ ਲਿਆ ਸੀ। ਉਸ ਦੇ ਡੀ. ਐੱਨ. ਏ. ਟੈਸਟ ਲਈ ਜੰਮੂ-ਕਸ਼ਮੀਰ ਪੁਲਸ ਨੇ ਪੁਲਵਾਮਾ ’ਚ ਉਸ ਦੇ ਮਾਤਾ-ਪਿਤਾ ਤੇ 2 ਭਰਾਵਾਂ ਨੂੰ ਹਿਰਾਸਤ ਵਿਚ ਲਿਆ ਹੈ।
ਪੁਲਵਾਮਾ ਤੋਂ ਹੀ ਉਮਰ ਦੇ ਦੋਸਤ ਡਾ. ਸੱਜਾਦ ਨੂੰ ਵੀ ਹਿਰਾਸਤ ਵਿਚ ਲਿਆ ਗਿਆ ਹੈ। ਉਸ ਦਾ ਇਕ ਦਿਨ ਪਹਿਲਾਂ ਹੀ ਵਿਆਹ ਹੋਇਆ ਹੈ। ਇੱਧਰ ਹਰਿਆਣਾ ਦੇ ਫਰੀਦਾਬਾਦ ਤੋਂ ਇਕ ਔਰਤ ਡਾ. ਸ਼ਾਹੀਨ ਸ਼ਾਹਿਦ ਦੀ ਗ੍ਰਿਫਤਾਰੀ ਹੋਈ ਹੈ, ਜੋ ਭਾਰਤ ਵਿਚ ਜੈਸ਼-ਏ-ਮੁਹੰਮਦ ਦੀ ਮਹਿਲਾ ਵਿੰਗ ‘ਜਮਾਤ-ਉਲ-ਮੋਮੀਨਾਤ’ ਦੀ ਮੁਖੀ ਸੀ। ਪਾਕਿਸਤਾਨ ਵਿਚ ਅੱਤਵਾਦੀ ਅਜ਼ਹਰ ਮਸੂਦ ਦੀ ਭੈਣ ਸਾਦੀਆ ਇਸ ਦੀ ਚੀਫ ਹੈ।
ਦੋਸ਼ੀਆਂ ਨੂੰ ਨਹੀਂ ਬਖਸ਼ਾਂਗੇ : ਸ਼ਾਹ
ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਲਾਲ ਕਿਲੇ ਦੇ ਨੇੜੇ ਹੋਏ ਧਮਾਕੇ ਤੋਂ ਬਾਅਦ ਕੌਮੀ ਰਾਜਧਾਨੀ ਅਤੇ ਦੇਸ਼ ਦੇ ਹੋਰਨਾਂ ਹਿੱਸਿਆਂ ਵਿਚ ਸੁਰੱਖਿਆ ਸਥਿਤੀ ਦੀ ਸਮੀਖਿਆ ਕੀਤੀ। ਉਨ੍ਹਾਂ ਕਿਹਾ ਕਿ ਇਸ ਧਮਾਕੇ ਲਈ ਜ਼ਿੰਮੇਵਾਰ ਸਾਰੇ ਲੋਕਾਂ ਨੂੰ ਸੁਰੱਖਿਆ ਏਜੰਸੀਆਂ ਦੇ ਕਹਿਰ ਦਾ ਸਾਹਮਣਾ ਕਰਨਾ ਪਵੇਗਾ ਅਤੇ ਕਿਸੇ ਨੂੰ ਬਖਸ਼ਿਆ ਨਹੀਂ ਜਾਵੇਗਾ। ਉਨ੍ਹਾਂ ਇਹ ਗੱਲ ਧਮਾਕੇ ਦੇ ਮੱਦੇਨਜ਼ਰ ਆਯੋਜਿਤ 2 ਸੁਰੱਖਿਆ ਬੈਠਕਾਂ ਦੀ ਪ੍ਰਧਾਨਗੀ ਕਰਨ ਪਿੱਛੋਂ ਕਹੀ।
ਬੈਠਕ ਦੌਰਾਨ ਚੋਟੀ ਦੇ ਅਧਿਕਾਰੀਆਂ ਨੇ ਗ੍ਰਹਿ ਮੰਤਰੀ ਸਾਹਮਣੇ ਧਮਾਕੇ ਤੋਂ ਬਾਅਦ ਬਣੇ ਹਾਲਾਤ ’ਤੇ ਵਿਸਤ੍ਰਿਤ ਪੇਸ਼ਕਾਰੀ ਦਿੱਤੀ। ਸੂਤਰਾਂ ਨੇ ਦੱਸਿਆ ਕਿ ਦੁਪਹਿਰ ਦੀ ਸੁਰੱਖਿਆ ਸਮੀਖਿਆ ਬੈਠਕ ’ਚ ਵੀ ਉਹੀ ਅਧਿਕਾਰੀ ਸ਼ਾਮਲ ਹੋਏ। ਗ੍ਰਹਿ ਮੰਤਰਾਲਾ ਨੇ ਧਮਾਕੇ ਦੀ ਗੰਭੀਰਤਾ ਅਤੇ ਹਾਲਾਤ ਦੀ ਸੰਵੇਦਨਸ਼ੀਲਤਾ ਨੂੰ ਵੇਖਦੇ ਹੋਏ ਪੂਰੀ ਜਾਂਚ ਕੌਮੀ ਜਾਂਚ ਏਜੰਸੀ (ਐੱਨ. ਆਈ. ਏ.) ਨੂੰ ਸੌਂਪ ਦਿੱਤੀ ਹੈ।
ਐੱਨ. ਆਈ. ਏ. ਨੂੰ ਜਾਂਚ ਸੌਂਪੀ ਜਾਣੀ ਇਸ ਗੱਲ ਦਾ ਸਪਸ਼ਟ ਸੰਕੇਤ ਹੈ ਕਿ ਸਰਕਾਰ ਨੇ ਇਸ ਵਾਰਦਾਤ ਨੂੰ ਅੱਤਵਾਦੀਆਂ ਦੀ ਕਰਤੂਤ ਮੰਨਿਆ ਹੈ।
Read More : ਪੀ.ਯੂ. ਨੂੰ ਭਾਜਪਾ ਦੀ ਸਿਆਸੀ ਖੇਡ ਦਾ ਮੋਹਰਾ ਨਹੀਂ ਬਣਨ ਦੇਣਗੇ ਪੰਜਾਬੀ : ਬਾਜਵਾ