ਮੁੰਬਈ, 24 ਨਵੰਬਰ : ‘ਸੱਤਿਆਕਾਮ’ ਤੋਂ ਲੈ ਕੇ ‘ਸ਼ੋਅਲੇ’ ਤਕ 300 ਤੋਂ ਵੱਧ ਫਿਲਮਾਂ ਵਿਚ ਕੰਮ ਕਰ ਕੇ ਮਨੋਰੰਜਨ ਜਗਤ ’ਚ ਇਕ ਵੱਖਰਾ ਮੁਕਾਮ ਹਾਸਲ ਕਰਨ ਵਾਲੇ ਬਾਲੀਵੁੱਡ ਦੇ ‘ਹੀ-ਮੈਨ’ਧਰਮਿੰਦਰ ਦਾ ਸੋਮਵਾਰ ਨੂੰ ਇੱਥੇ ਦਿਹਾਂਤ ਹੋ ਗਿਆ। ਉਹ 89 ਸਾਲ ਦੇ ਸਨ।
ਮਹਾਨ ਅਭਿਨੇਤਾ ਧਰਮਿੰਦਰ ਪਿਛਲੇ ਕੁਝ ਸਮੇਂ ਤੋਂ ਬੀਮਾਰ ਸਨ ਅਤੇ ਮੁੰਬਈ ਦੇ ਇਕ ਹਸਪਤਾਲ ਵਿਚ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਸੀ। ਪਰਿਵਾਰ ਨੇ ਇਸ ਮਹੀਨੇ ਦੇ ਸ਼ੁਰੂ ਵਿਚ ਘਰ ’ਚ ਹੀ ਉਨ੍ਹਾਂ ਦਾ ਇਲਾਜ ਜਾਰੀ ਰੱਖਣ ਦਾ ਫੈਸਲਾ ਕੀਤਾ ਸੀ। ਉਨ੍ਹਾਂ ਨੇ 8 ਦਸੰਬਰ ਨੂੰ 90 ਸਾਲ ਦਾ ਹੋ ਜਾਣਾ ਸੀ।
‘ਫੂਲ ਔਰ ਪੱਥਰ’ ਦੀ ਸਫਲਤਾ ਤੋਂ ਬਾਅਦ ਧਰਮਿੰਦਰ ਦੀ ਇਮੇਜ ‘ਹੀ-ਮੈਨ’ ਦੇ ਰੂਪ ’ਚ ਬਣ ਗਈ ਸੀ। ਇਸ ਫਿਲਮ ਤੋਂ ਬਾਅਦ ਨਿਰਮਾਤਾ-ਨਿਰਦੇਸ਼ਕਾਂ ਨੇ ਜ਼ਿਆਦਾਤਰ ਫਿਲਮਾਂ ਵਿਚ ਧਰਮਿੰਦਰ ਦੀ ਇਸੇ ਇਮੇਜ ਨੂੰ ਕੈਸ਼ ਕਰਵਾਇਆ। ਉਨ੍ਹਾਂ ਦੀ ਸ਼ਾਨਦਾਰ ਲੁੱਕ ਕਾਰਨ ਉਨ੍ਹਾਂ ਨੂੰ ਬਾਲੀਵੁੱਡ ਦਾ ‘ਗ੍ਰੀਕ ਗੌਡ’ ਉਪ-ਨਾਂ ਵੀ ਮਿਲਿਆ।
ਪੰਜਾਬ ’ਚ ਲੁਧਿਆਣਾ ਜ਼ਿਲੇ ਦੇ ਨਸਰਾਲੀ ਪਿੰਡ ’ਚ 8 ਦਸੰਬਰ,1935 ਨੂੰ ਕਿਸਾਨ ਪਰਿਵਾਰ ਵਿਚ ਇਕ ਆਦਰਸ਼ਵਾਦੀ ਸਕੂਲ ਅਧਿਆਪਕ ਦੇ ਘਰ ਪੈਦਾ ਹੋਏ ਧਰਮਿੰਦਰ ਦਾ ਅਸਲੀ ਨਾਂ ਧਰਮ ਸਿੰਘ ਦਿਓਲ ਸੀ ਅਤੇ ਉਨ੍ਹਾਂ ਦਾ ਫਿਲਮੀ ਕਰੀਅਰ 6 ਦਹਾਕਿਆਂ ਤੋਂ ਵੱਧ ਦਾ ਰਿਹਾ।
ਉਨ੍ਹਾਂ ਸਾਲ 1960 ’ਚ ਪ੍ਰਦਰਸ਼ਿਤ ਫਿਲਮ ‘ਦਿਲ ਭੀ ਤੇਰਾ ਹਮ ਭੀ ਤੇਰੇ’ ਨਾਲ ਆਪਣੇ ਸਿਨੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਧਰਮਿੰਦਰ ਨੇ ਰਾਜੇਸ਼ ਖੰਨਾ ਦੀ ਸੁਪਰ ਸਟਾਰ ਇਮੇਜ ਅਤੇ ਅਮਿਤਾਭ ਬੱਚਨ ਦੀ ਵਧਦੀ ਲੋਕਪ੍ਰਿਯਤਾ ਦੇ ਬਾਵਜੂਦ ਮਜ਼ਬੂਤੀ ਨਾਲ ਆਪਣੇ ਪੈਰ ਕਮਰਸ਼ੀਅਲ ਸਿਨੇਮਾ ’ਚ ਜਮਾਈ ਰੱਖੇ।
ਉਨ੍ਹਾਂ ਨੇ ‘ਸ਼ੋਅਲੇ’, ‘ਚੁਪਕੇ-ਚੁਪਕੇ’, ‘ਸੱਤਿਆਕਾਮ’, ‘ਅਨੁਪਮਾ’, ‘ਸੀਤਾ ਔਰ ਗੀਤਾ’ ਵਰਗੀਆਂ ਕਈ ਹਿਟ ਫਿਲਮਾਂ ਵਿਚ ਮੁੱਖ ਭੂਮਿਕਾਵਾਂ ਨਿਭਾਈਆਂ। ਐਕਸ਼ਨ, ਰੋਮਾਂਸ ਤੇ ਕਾਮੇਡੀ ’ਚ ਆਪਣੇ ਬਹੁਮੁਖੀ ਹੁਨਰ ਲਈ ਉਨ੍ਹਾਂ ਨੂੰ ਵੱਡੇ ਪੱਧਰ ’ਤੇ ਸਲਾਹਿਆ ਗਿਆ। ਉਨ੍ਹਾਂ ਦੀ ਆਖਰੀ ਫਿਲਮ ‘ਇੱਕੀਸ’ ਅਗਲੇ ਮਹੀਨੇ ਰਿਲੀਜ਼ ਹੋਵੇਗੀ। ਫਿਲਮ ਨਿਰਮਾਤਾਵਾਂ ਨੇ ਅੱਜ ਹੀ ਫਿਲਮ ਦਾ ਪੋਸਟਰ ਜਾਰੀ ਕੀਤਾ ਹੈ, ਜਿਸ ਵਿਚ ਧਰਮਿੰਦਰ ਵਿਖਾਈ ਦੇ ਰਹੇ ਹਨ।
Read More : ਲਾੜੇ ਦੀ ਭਰਾ ਦੀ ਸੜਕ ਹਾਦਸੇ ਵਿਚ ਮੌਤ