ਇਕ ਗੋਲੀ ਲੱਤ ’ਚ ਵੱਜੀ ਤੇ ਦੂਜੀ ਛੂਹ ਕੇ ਨਿਕਲ ਗਈ
ਸਮਰਾਲਾ, 11 ਨਵੰਬਰ : ਪਿੰਡ ਘੁਲਾਲ ਵਿਖੇ ਲੁਧਿਆਣਾ-ਚੰਡੀਗੜ ਕੌਮੀ ਮਾਰਗ ’ਤੇ ਸਥਿਤ ਟੋਲ ਪਲਾਜ਼ਾ ਦੇ ਮੈਨੇਜਰ ਨੂੰ ਦਿਨ-ਦਿਹਾੜੇ ਕਾਰ ਸਵਾਰ ਕੁਝ ਵਿਅਕਤੀਆਂ ਨੇ ਗੋਲੀਆਂ ਮਾਰ ਕੇ ਗੰਭੀਰ ਜ਼ਖ਼ਮੀ ਕਰ ਦਿੱਤਾ । ਇਹ ਵਾਰਦਾਤ ਦੁਪਹਿਰ ਕਰੀਬ 3.30 ਵਜੇ ਦੀ ਦੱਸੀ ਜਾ ਰਹੀ ਹੈ।
ਟੋਲ ਪਲਾਜ਼ਾ ਦੇ ਮੈਨੇਜਰ ਯਾਦਵਿੰਦਰ ਸਿੰਘ (45) ਦੀ ਲੱਤ ’ਚ ਇਕ ਗੋਲੀ ਵੱਜੀ, ਜਦਕਿ ਇਕ ਹੋਰ ਗੋਲੀ ਉਸ ਨੂੰ ਛੂਹ ਕੇ ਲੰਘ ਗਈ। ਗੰਭੀਰ ਹਾਲਤ ’ਚ ਮੈਨੇਜਰ ਨੂੰ ਐੱਨ. ਐੱਚ. ਏ.ਆਈ. ਦੀ ਹਾਈਵੇ ਐਬੂਲੈਂਸ ਵੱਲੋਂ ਤੁਰੰਤ ਸਿਵਲ ਹਸਪਤਾਲ ਸਮਰਾਲਾ ਵਿਖੇ ਪਹੁੰਚਾਇਆ ਗਿਆ। ਮੈਨੇਜਰ ਯਾਦਵਿੰਦਰ ਸਿੰਘ ਘਟਨਾ ਵੇਲੇ ਡਿਊਟੀ ’ਤੇ ਹਾਜ਼ਰ ਸੀ। ਅਚਾਨਕ ਇਕ ਡਿਜ਼ਾਇਰ ਕਾਰ ’ਚ ਸਵਾਰ 4 ਵਿਅਕਤੀ ਆਏ ਅਤੇ ਮੈਨੇਜਰ ’ਤੇ ਹਮਲਾ ਕਰ, ਜਿਸ ਕਾਰਨ ਉਹ ਗੰਭੀਰ ਜ਼ਖ਼ਮੀ ਹੋ ਗਿਆ।
ਇਸ ਸਬੰਧੀ ਡੀ. ਐੱਸ.ਪੀ. ਤਰਲੋਚਨ ਸਿੰਘ ਨੇ ਦੱਸਿਆ ਕਿ ਜਿਉਂ ਹੀ ਪੁਲਸ ਨੂੰ ਇਸ ਵਾਰਦਾਤ ਦੀ ਸੂਚਨਾ ਮਿਲੀ ਤਾਂ ਪੁਲਸ ਕੁਝ ਮਿੰਟਾਂ ’ਚ ਹੀ ਮੌਕੇ ’ਤੇ ਪਹੁੰਚ ਗਈ। ਹੁਣ ਤੱਕ ਦੀ ਪੜਤਾਲ ’ਚ ਜਿਹੜੀ ਗੱਲ ਸਾਹਮਣੇ ਆਈ ਹੈ, ਉਸ ਤੋਂ ਪਤਾ ਲੱਗਦਾ ਹੈ ਕਿ ਰੰਜਿਸ਼ ਤਹਿਤ ਇਸ ਘਟਨਾ ਨੂੰ ਅੰਜਾਮ ਦਿੱਤਾ ਗਿਆ ਹੈ।
ਉਨ੍ਹਾਂ ਦੱਸਿਆ ਕਿ ਜ਼ਖ਼ਮੀ ਹੋਇਆ ਮੈਨੇਜਰ ਇਸ ਤੋਂ ਪਹਿਲਾਂ ਜਲੰਧਰ-ਅੰਮ੍ਰਿਤਸਰ ਰੋਡ ’ਤੇ ਸਥਿਤ ਢਿੱਲਵਾਂ ਟੋਲ ਪਲਾਜ਼ਾ ’ਤੇ ਵੀ ਡਿਊਟੀ ਨਿਭਾਅ ਚੁੱਕਿਆ ਹੈ। ਉੱਥੇ ਹੀ ਕਿਸੇ ਗੱਲ ਨੂੰ ਲੈ ਕੇ ਪੈਦਾ ਹੋਈ ਰੰਜਿਸ਼ ਤੋਂ ਬਾਅਦ ਕਥਿਤ ਤੌਰ ’ਤੇ ਕਪੂਰਥਲਾ ਦੇ ਨਛੱਤਰ ਸਿੰਘ ਨੇ ਆਪਣੇ 3 ਹੋਰ ਸਾਥੀਆਂ ਸਮੇਤ ਇਸ ਵਾਰਦਾਤ ਨੂੰ ਅੰਜਾਮ ਦਿੱਤਾ । ਉਨ੍ਹਾਂ ਦੱਸਿਆ ਕਿ ਪੁਲਸ ਪੂਰੇ ਮਾਮਲੇ ਦੀ ਪੜਤਾਲ ’ਚ ਲੱਗੀ ਹੋਈ ਹੈ ਤੇ ਜਿਸ ਕਾਰ ’ਚ ਹਮਲਾਵਾਰ ਆਏ ਦੱਸੇ ਗਏ ਹਨ, ਉਸ ਨੂੰ ਕਾਬੂ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
ਸਿਵਲ ਹਸਪਤਾਲ ਵਿਖੇ ਐਮਰਜੈਂਸੀ ਵਿਭਾਗ ਦੇ ਡਾਕਟਰ ਨੇ ਦੱਸਿਆ ਕਿ ਯਾਦਵਿੰਦਰ ਸਿੰਘ ਦੀ ਸੱਜੀ ਲੱਤ ਵਿਚ ਗੋਲੀ ਫਸੀ ਹੋਈ ਹੈ। ਇਕ ਹੋਰ ਗੋਲੀ ਉਸ ਨੂੰ ਛੂਹ ਕੇ ਲੰਘ ਗਈ। ਭਾਵੇਂ ਉਸ ਦੀ ਹਾਲਤ ਤਾਂ ਸਥਿਰ ਹੈ ਪਰ ਲੱਤ ’ਚ ਫਸੀ ਗੋਲੀ ਕੱਢਣ ਲਈ ਉਸ ਨੂੰ ਚੰਡੀਗੜ੍ਹ ਰੈਫਰ ਕਰ ਦਿੱਤਾ ਗਿਆ ਹੈ।
Read More : ਮਾਮੂਲੀ ਝਗੜੇ ਤੋਂ ਬਾਅਦ ਕਿਰਚ ਨਾਲ ਨੌਜਵਾਨ ਦਾ ਕਤਲ