-ਕਰਾਲਾ ਅਤੇ ਜਾਂਸਲਾ ਸਕੂਲ ਦਾ ਕੀਤਾ ਨਿਰੀਖ਼ਣ
ਬਨੂਡ਼ -: ਪੰਜਾਬ ਦੇ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਅਤੇ ਦਿੱਲੀ ਦੇ ਸਾਬਕਾ ਉੱਪ ਮੁੱਖ ਮੰਤਰੀ ਮਨੀਸ਼ ਸ਼ਿਸੋਦੀਆ ਵੱਲੋਂ ਬਨੂੜ ਖੇਤਰ ਦੇ ਦੋ ਸਕੂਲਾਂ ਦਾ ਨਿਰੀਖਣ ਕੀਤਾ ਗਿਆ। ਜਾਣਕਾਰੀ ਅਨੁਸਾਰ ਸਿੱਖਿਆ ਮੰਤਰੀ ਅਤੇ ਕੇਂਦਰੀ ਆਪ ਆਗੂ ਦੁਪਹਿਰ ਸਵਾ ਕੁ ਬਾਰਾਂ ਵਜੇ ਪਹਿਲਾਂ ਕਰਾਲਾ ਦੇ ਹਾਈ ਸਕੂਲ ਵਿਖੇ ਪਹੁੰਚੇ। ਇੱਥੇ ਉਨ੍ਹਾਂ ਮਿੱਡ-ਡੇਅ-ਮੀਲ, ਸਕੂਲ ਦੇ ਗਰਾਊਂਡ, ਸਕੂਲ ਵਿਚ ਆਈਆਂ ਗਰਾਟਾਂ ਆਦਿ ਦਾ ਨਿਰੀਖ਼ਣ ਕੀਤਾ। ਉਨ੍ਹਾਂ ਸਕੂਲ ਵਿਚ ਬੱਚਿਆਂ ਦੀ ਗਿਣਤੀ ਅਤੇ ਦਾਖ਼ਲਾ ਮੁਹਿੰਮ ਬਾਰੇ ਜਾਣਕਾਰੀ ਲਈ।
ਇਸ ਤੋਂ ਬਾਅਦ ਉਨ੍ਹਾਂ ਵੱਖ-ਵੱਖ ਕਲਾਸਾਂ ਦਾ ਵੀ ਨਿਰੀਖ਼ਣ ਕੀਤਾ। ਸਕੂਲੀ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਦੀ ਹਾਜ਼ਰੀ ਵੀ ਚੈੱਕ ਕੀਤੀ। ਉਨ੍ਹਾਂ ਸਕੂਲ ਦੀ ਕੰਪਿਊਟਰ ਲੈਬ ਵਿਚ ਕੰਪਿਊਟਰ ਦੀਆਂ ਕਲਾਸਾਂ ਲਗਾ ਰਹੇ ਸੱਤਵੀਂ ਕਲਾਸ ਦੇ ਵਿਦਿਆਰਥੀਆਂ ਨਾਲ ਸਵਾਲ-ਜਵਾਬ ਵੀ ਕੀਤੇ। ਉਹ ਕਰਾਲਾ ਸਕੂਲ ਵਿਚ ਅੱਧੇ ਘੰਟੇ ਤੋਂ ਵੱਧ ਸਮਾਂ ਰਹੇ। ਉਨ੍ਹਾਂ ਸਕੂਲ ਦੀ ਮੁੱਖ ਅਧਿਆਪਕਾ ਨਾਲ ਗੱਲਬਾਤ ਕਰ ਕੇ ਸਕੂਲ ਦੀਆਂ ਸਮੱਸਿਆਵਾਂ ਵੀ ਸੁਣੀਆਂ।
ਇਸ ਤੋਂ ਬਾਅਦ ਮੰਤਰੀ ਬੈਂਸ ਅਤੇ ਸ਼ਿਸੋਦੀਆ ਬਨੂੜ ਤੋਂ ਰਾਜਪੁਰਾ ਨੂੰ ਜਾਂਦੇ ਕੌਮੀ ਮਾਰਗ ਤੇ ਪੈਂਦੇ ਪਿੰਡ ਜਾਂਸਲਾ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਪਹੁੰਚੇ। ਇਥੇ ਵੀ ਉਨ੍ਹਾਂ ਸਕੂਲ ਵਿਚ ਚੱਲਦੇ ਵੱਖ-ਵੱਖ ਪ੍ਰੋਜੈਕਟਾਂ ਦਾ ਨਿਰੀਖ਼ਣ ਕੀਤਾ। ਉਨ੍ਹਾਂ ਗਿਆਰਵੀਂ ਕਲਾਸ ਵਿਚ ਪੜਦੇ ਵਿਦਿਆਰਥੀਆਂ ਨਾਲ ਉਨ੍ਹਾਂ ਦੇ ਕੈਰੀਅਰ ਸਬੰਧੀ ਸਵਾਲ ਪੁੱਛੇ। ਉਨ੍ਹਾਂ ਸਕੂਲ ਵਿਚ ਬੱਚਿਆਂ ਦੀ 600 ਦੇ ਕਰੀਬ ਗਿਣਤੀ ਉੱਤੇ ਵੀ ਤਸੱਲੀ ਪ੍ਰਗਟਾਈ। ਉਹ ਕੰਪਿਊਟਰ ਲੈਬ ਅਤੇ ਸਕੂਲ ਦੀ ਲਾਇਬ੍ਰੇਰੀ ਵਿਚ ਵੀ ਗਏ।
ਉਨ੍ਹਾਂ ਅਧਿਆਪਕਾਂ ਨਾਲ ਵੀ ਗੱਲਬਾਤ ਕੀਤੀ। ਮਿੱਡ-ਡੇਅ-ਮੀਲ ਦੇ ਖਾਣੇ ਦੀ ਵੀ ਜਾਂਚ ਕੀਤੀ। ਪਤਾ ਲੱਗੇ ਹੈ ਕਿ ਦੋਵੇਂ ਥਾਵਾਂ ਉੱਤੇ ਸ੍ਰੀ ਸ਼ਿਸੋਦੀਆ ਅਤੇ ਸ੍ਰੀ ਬੈਂਸ ਨੇ ਸਕੂਲਾਂ ਦੇ ਮੁਖੀਆਂ ਅਤੇ ਅਧਿਆਪਕਾਂ ਦੀ ਪ੍ਰਸੰਸਾ ਕੀਤੀ। ਕਰਾਲਾ ਸਕੂਲ ਦੀ ਮੁਖੀ ਪ੍ਰੇਰਣਾ ਛਾਬਡ਼ਾ ਅਤੇ ਜਾਂਸਲਾ ਸਕੂਲ ਦੇ ਪ੍ਰਿੰਸੀਪਲ ਸੰਦੀਪ ਕੁਮਾਰ ਨੇ ਸੰਪਰਕ ਕਰਨ ਉੱਤੇ ਸ੍ਰੀ ਮਨੀਸ਼ ਕੁਮਾਰ ਸਸ਼ੋਦੀਆ ਅਤੇ ਸ੍ਰੀ ਬੈਂਸ ਦੇ ਅਚੰਕੇਤੀ ਸਕੂਲ ਵਿੱਚ ਆਉਣ ਦੀ ਪੁਸ਼ਟੀ ਕੀਤੀ।