ਪਾਤੜਾਂ, 27 ਸਤੰਬਰ : ਜ਼ਿਲਾ ਪਟਿਆਲਾ ਦੇ ਸ਼ਹਿਰ ਪਾਤੜਾਂ ਦੀ ਪ੍ਰਤਿਭਾ ਪ੍ਰਿਯੰਸ਼ੀ ਨੇ ਆਪਣੇ ਅਦਭੁੱਤ ਅਕਾਦਮਿਕ ਕਾਬਲੀਅਤ ਅਤੇ ਦ੍ਰਿੜ੍ਹ ਮਿਹਨਤ ਦੇ ਆਧਾਰ ’ਤੇ ਵੱਡੀ ਉਪਲਬਧੀ ਹਾਸਲ ਕੀਤੀ ਹੈ। ਉਸਨੇ ਹਿਮਾਚਲ ਪ੍ਰਦੇਸ਼ ਲੋਕ ਸੇਵਾ ਕਮਿਸ਼ਨ ਵੱਲੋਂ 26 ਸਤੰਬਰ ਨੂੰ ਐਲਾਨੇ ਹਿਮਾਚਲ ਪ੍ਰਦੇਸ਼ ਜੁੂਡੀਸ਼ਲ ਸਰਵਿਸ ਦੇ ਅੰਤਿਮ ਨਤੀਜਿਆਂ ’ਚ ਸਿਵਲ ਜੱਜ (ਜੂਨੀਅਰ ਡਵੀਜ਼ਨ) ਵਜੋਂ ਆਪਣੀ ਜਗ੍ਹਾ ਬਣਾਈ ਹੈ।
ਪ੍ਰਿਯੰਸ਼ੀ ਦੀ ਸ਼ਮੂਲੀਅਤ ਉਸਦੇ ਪਰਿਵਾਰ ਅਤੇ ਪਾਤੜਾਂ ਖੇਤਰ ਲਈ ਮਾਣ ਦਾ ਮੌਕਾ ਹੈ। ਪ੍ਰਿਯੰਸ਼ੀ, ਜੋ ਪਿੰਡ ਰੇਤਗੜ੍ਹ ਵਿਚ ਜਨਮੀ ਅਤੇ ਸਨਸਿਟੀ ਕਾਲੋਨੀ, ਪਾਤੜਾਂ ’ਚ ਰਹਿੰਦੀ ਹੈ, ਕਾਰੋਬਾਰੀ ਸਰਜੀਵਨ ਕੁਮਾਰ ਅਤੇ ਸਰੋਜ ਬੰਸਲ ਦੀ ਧੀ ਹੈ। ਉਸਨੇ ਦਸਵੀਂ ਕਲਾਸ ਡੀ. ਏ. ਵੀ. ਪਬਲਿਕ ਸਕੂਲ ਸਮਾਣਾ ਤੋਂ 10 ਸੀ. ਜੀ. ਪੀ. ਏ. ਅਤੇ 12ਵੀਂ ਕਲਾਸ (ਕਾਮਰਸ) -ਬੁੱਢਾ ਦਲ ਪਬਲਿਕ ਸਕੂਲ ਸਮਾਣਾ ਤੋਂ 95.4 ਫੀਸਦੀ ਅੰਕ ਨਾਲ ਪਾਸ ਕੀਤੀ।
ਕਾਨੂੰਨੀ ਡਿਗਰੀ (ਐੱਲ. ਐੱਲ. ਬੀ.) – ਆਰਮੀ ਇੰਸਟੀਚਿਊਟ ਆਫ਼ ਲਾਅ, ਮੋਹਾਲੀ ਤੋਂ 2024 ’ਚ 82.02 ਫੀਸਦੀ ਅੰਕ ਨਾਲ ਪਾਸ ਕੀਤੀ। ਕਾਨੂੰਨੀ ਡਿਗਰੀ ਪੂਰੀ ਕਰਦੇ ਹੀ ਐੱਚ. ਪੀ. ਜੇ. ਐੱਸ. ਦੀ ਪ੍ਰੀਖਿਆ ’ਚ ਉਸਦੀ ਸਿੱਧੀ ਚੋਣ ਉਸਦੀ ਅਸਾਧਾਰਣ ਯੋਗਤਾ ਅਤੇ ਲਗਨ ਦਾ ਪ੍ਰਮਾਣ ਹੈ।
ਇਸ ਦੌਰਾਨ ਪ੍ਰਿਯੰਸ਼ੀ ਦੀ ਇਸ ਵੱਡੀ ਉਪਲਬਧੀ ’ਤੇ ਉਸਦਾ ਪਰਿਵਾਰ ਬੇਹੱਦ ਖੁਸ਼ ਹੈ। ਉਹ ਪਾਤੜਾਂ ਸ਼ਹਿਰ ਦੇ ਸੀਨੀਅਰ ਕਾਂਗਰਸੀ ਆਗੂ ਪਵਨ ਕੁਮਾਰ ਪਟਵਾਰੀ ਦੇ ਸਾਲੇ ਦੀ ਬੇਟੀ ਵੀ ਹੈ। ਪ੍ਰਿਯੰਸ਼ੀ ਦੀ ਇਹ ਸਫਲਤਾ ਪੰਜਾਬ ਅਤੇ ਹਿਮਾਚਲ ਦੇ ਨੌਜਵਾਨਾਂ ਲਈ ਇਕ ਪ੍ਰੇਰਣਾ ਸਰੋਤ ਹੈ।
ਸਿਵਲ ਜੱਜ ਵਜੋਂ ਪ੍ਰਿਯੰਸ਼ੀ ਦਾ ਮੁੱਖ ਟੀਚਾ ਨਿਆਂ ਪ੍ਰਣਾਲੀ ’ਚ ਪ੍ਰਭਾਵਸ਼ਾਲੀ ਭੂਮਿਕਾ ਨਿਭਾਉਣਾ ਅਤੇ ਸਮਾਜ ’ਚ ਨਿਆਂ ਤੇ ਸੱਚਾਈ ਨੂੰ ਹੋਰ ਮਜ਼ਬੂਤ ਕਰਨਾ ਹੈ।
Read More : ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਸੀ.ਪੀਜ਼ ਤੇ ਐੱਸ.ਐੱਸ.ਪੀਜ਼ ਨੂੰ ਹਦਾਇਤਾਂ